BAUKAU, STLTIMORLESTE.com – Insendiu neebe akontese iha Aldeia Dara-Oma, Suku Laisorolai de Baixo, Postu Administrativu Matebian, rezulta idozu Agostinho Gomes uma hela fatin mutuk hodi lakon sasan no osan US$ 1,700.
Xefe Suku Laisorulai de Baixo, Julio Farkhus Pinto esplika, insediu refere akontese iha loron 15 Junhu tinan nee, pur-volta tuku 01:30, neebe vitima sunu ahi, maibe intensivu anin makaas, ahi alastra fali ba vitima nia uma hela fatin hodi rezulta sasan uma laran mutuk total inklui osan la konsege salva.
“Katuas hela mesak sunu ai mak diskuidu, tanba anin ai han tiha nia uma nee, sasan hahan, rekening no osan US$ 1,700.00 idozu nian la salva,” hateten Farkhus ba STL iha Vila Nova, Segunda (16/06/2025).
Nia sublina, hafoin insendiu komunidade sira konsege halai ba vitima nia hela fatin atu salva, maibe la konsege, tanba distansia entre vitima ho komunidade hela dook malu nunee bainhira komunidade sira too iha fatin insendiu haree deit mak aukdesan.
Nia fundamenta, uma neebe vitima harii modelu ai riin haat neebe durante nee vitima hela ba, maibe daudaun laiha ona hela fatin no provizoriu hela ho familia sira.
“Hanesan Autoridade halo ona levantamentu fasilita ona naran no uma neebe ahi han, ita relata ba APC Baukau inklui Munisipiu para tau atensaun emerjensia ruma,” Farkhus akresenta.
Autoridade Suku nee husu Autoridade Protesaun Sivil Munisipiu Baukau atu aselera prosesu apoiu emerjensia no apoiu material rekuperasaun ba vitima, nunee vitima bele konstrui hikas uma hela fatin, tanba durante hela mesak, maibe daudaun laiha hela fatin, provizoriu hela hamutuk ho familia sira.
(tom)
