DILI, STLTIMORLESTE.com – Prezidente Republika (PR), Jose Ramos Horta husu Governu halo politika diak nunee bele hatun kiak iha rai laran.
Prezidente Republika Jose Ramos Horta hatoo lia hirak nee ba jornalista sira iha Kantina Matak Palasiu Prezidensial Nikolao Lobato, Bairo Pite, Segunda (16/06/2025).
Prezidente Republika hatete, Governu presiza halo politika neebe mak diak nunee bele hatun kiak iha Timor Leste.
Governu hahu halo diskusaun ba Orsamentu Jeral Estadu ba tinan 2026, Prezidente nia haree prioridade saida mak Governu tau iha tinan oin? Hatan ba kestaun nee Prezidente Republika hatete, Governu presiza iha politika diak hodi hatun numeru kiak iha rai laran.
“Hanesan Primeiru Ministru hatene no Governu hatene no ema hotu hatene Prezidensia nia preokupasaun boot liu mak nee, ita tenke halo politika neebe bele hatun kiak iha rai laran, luta kontra pobreza, para hatun kiak iha rai laran, ita tenke halo politika neebe hatun sub nutrisaun,” dehan Prezidente Republika.
Prezidente Republika hatete, Governu tenke halo politika hodi hatun sub nutrisaun labarik sira nia bele hadia falta bee moos.
“Tenke haree oinsa rezolve problema nee iha Timor Leste, bee moos ba populasaun, ida fali saneamentu, sintina, nee hau nia preokupasaun nuudar Prezidente no preokupasaun mos Primeiru Ministru nia, no preokupasaun prioridade neebe parseiru dezenvolvimentu sira konkorda ho ida nee,” dehan Prezidente Republika.
Xefe Estadu hatutan, presiza mos hadia setor edukasaun, presiza haree kondisaun eskola nomos haree meius hanesan sintina ba labarik estudante sira feto ka mane, tenke hadia merenda eskolar iha eskola sira tenke haree mos bee moos iha eskola sira.
Ida seluk mak setor saude mos importante tebes, laos deit haree moras sira iha hospital deit, maibe haree mos ba prevensaun liu husi saude publika, no buat barak seluk tan hanesan infraestrutura Estrada rural.
“Foin daudaun hau koalia ho maun boot Primeiru Ministru situasaun fronteira neeba nee iha Munisipiu rua iha Fronteira Kovalima ho Maliana, ita ba karik sub Distritu sira hanesan Fatululik fatumea, Fohorem, fatin neebe abandonadu los, hau husu Primeiru Ministru favor haree oinsa hadia kondisaun Estrada, edukasaun saude, iha fronteira no hadia setor ekonomia, ida nee mak hau nia preokupasaun ida,” katak PR Horta.
Xefe Estadu hatete, liga ho ninia preokupasaun hotu neebe nia haree, PR rasik hatoo ona ba iha Primeiru Ministru Kay Rala Xanana Gusmão hodi bele buka hadia.
(eme)
