DILI, STLTIMORLESTE.com – Prezidensia Republika (PR) kada loron fo han labarik sira besik rihun ida resin iha fatin oin-oin, iha Dili laran inklui fatin ida iha RAEOA.
Prezidente Republika Jose Ramos Horta ba jornalista sira iha Kantina Matak Palasiu Prezidensial Nikolao Lobato, Bairo Pite, Segunda (16/06/2025) hatete, kada loron Prezidensial Republika sempre fo han ba labarik sira.
Prezidente Republika hatoo kestaun nee bainhira remata partisipa serimonia entrega obra renovasaun Kantina Matak husi Embaixador Australia iha kantina matak Palasiu Prezidensial.
“Ohin ita halo mini inaugurasaun ida nee hotu-hotu hatene fo hahan loron-loron ba labarik sira programa Prezidensial nia iha Dili laran fatin haat “Fatin ida iha nee (kantina matak), ida iha Komoro eskola Labeh, ida iha Lesidere no ida iha Hera depois ida iha Oekusi, total besik ona rihun ida resin, fo han loron-loron Segunda too Sesta, fo hahan neebe nutrisaun iha nee apoiu husi Embaixada Australia, ho forsa defeza Australia sira nia unidade enjeneria hadia tiha dapur, dapur nee sai modernu para bele fornese hahan diak liu tan ho kualidade saude publika,” dehan Prezidente Republika Jose Ramos Horta.
Prezidente Republika hatete, loron-loron labarik sira mai tenke fase liman no nunka falta haa no hemu bee, tanba problema boot iha Timor Leste laos deit labarik sira feto ka mane boot ka kiik ladun hemu bee, tanba nee mak problema moras rins barak.
Klaru tenke bee neebe kualidade laos kuaker bee hemu arbiru, maibe bee neebe oferese husi Embaixada Australia iha fatin neebe labarik sira haan ba bee diak no saudavel, tanba nee loke mangeira bele hemu kedas.
“Maibe iha nee o labele hemu bee torneira, tanba nee mak barak sosa bee Gota, Agua no seluk tan, ita seidauk iha meius trata bee ho didiak maibe situasaun mak ida nee tenke, iha nee ami fo edukasaun fase liman nee saude publika hemu bee, han aifuan, han modo, laos deit etu deit buat sira nee mak ho programa ida nee laos deit fo hahan deit,” dehan Prezidente Republika.
Prezidente Republika hatete, laos fo hahan ba labarik sira deit maibe fo mos formasaun ba labarik sira oinsa bele fase liman ho sabaun antes konsumu hahan ruma, ida nee atividade neebe Prezidensial halo hodi tulun labarik sira iha Timor Leste hodi hatun numeru mal nutrisaun iha rai laran no moris ho saudavel.
Xefe Estadu dehan, Forsa Defeza Australia neebe liu husi misaun iha Timor Leste halo parseria diak tebes tinan 20 resin ona ho Forsa Armadas programa ida ke diak liu no diak tebes iha Timor Leste, ida mak koperasaun iha area defeza no seguransa maibe laos nee deit, kooperasaun ho Australia diak tebes mos iha dezenvolvimentu rural.
Prezidente Republika hatete, iha kantina matak ajuda deit oan sira neebe mak iha difikuldade atu hetan nutrisaun neebe diak maibe orsamentu nee mai husi estadu Goveru, tanba nee hatoo agradese ba Governu liu-liu Xanana Gusmão, tanba orsamentu prezidensia nia ba parlamentu deputadu balun kestiona liu-liu pozisaun kestiona katak programa nee laos Prezidensia nia maibe MSSI, mais PM no Deputadu Governu apoiu 100% tanba komprende, tanba programa nee buka tane mos Governu nia programa.
(eme)
