DILI, STLTIMORLESTE.com – Prezidente Republika (PR), Jose Ramos Horta husu Lider Partidu Demokratiku (PD) atu prepara aan simu periodu tranzisaun jerasional neebe sei halao periodu tuir mai.
Prezidente Republika José Ramos Horta hatoo kestaun nee liu husi nia diskursu bainhira partisipa iha Aniversariu PD no husu atu prepara aan ba periodu tranzisaun jerasional.
Prezidente Ramos Horta apela ba PD atu prepara aan diak liu tan kuadru sira hodi simu periodu tranzisaun jerasional neebe sei halao iha períodu sira tuir mai.
“Husu atu kontinua halo kadernizasaun liu husi formasaun oin-oin ba kuadru mediu no superior sira, tanba mundu ohin loron iha situasaun kompleksu tebes,” dehan PR Horta liu husi Komunikadu neebe STL asesu husi media PR Segunda (16/06/2025).
Deklarasaun sira nee Prezidente Ramos Horta hatoo durante diskursu iha serimonia selebrasaun tinan 24, ezistensia PD (Junhu 2001- Junhu 2025), neebe halao iha sede nasional PD, Dili.
Xefe Estadu sublina importansia atu PD tau iha konsiderasaun ajenda internasional sira, liu-liu wainhira hetan fiar atu ukun.
Prezidente destaka katak kooperasaun ho nasaun sira seluk importante tebes ba dezenvolvimentu iha Timor Leste no Timor bele hetan benefísiu husi ninia integrasaun ba ASEAN, hanesan plataforma ba promove imajen Timor Leste nian ba mundu no hametin relasaun bilateral ho nasaun sira seluk.
Ikus liu, Prezidente no Lauriadu Nobel ba Pas hatoo ninia admirasaun ba PD nia perseveransa durante ninia ezisténsia tinan 24 nia laran, maske hasoru dezafiu internu oi-oin. Relembra mos katak, iha tinan 24 liuba, Prezidente ho korajen partisipa iha eventu neebe publikamente marka kriasaun partidu nian, hodi defende nesesidade hosi forsa polítika foun ida neebe foka ba futuru no hametin demokrasia timoroan nian, hanesan alternativa ida iha prosesu dezenvolvimentu nasional nian.
Dirije ba Prezidente Partidu, Mariano Asanami Sabino, membru estrutura no fundador sira hotu, Prezidente Ramos-Horta apresia tanba ho matenek iha lideransa ho simpatia no husu atu organiza-an disk liutan ho disiplina no partisipa ativu iha programa no eventu sira.
(eme)
