BAUKAU, STLTIMORLESTE.com – Konstrusaun ponte iha mota Suku Samalari, Postu Administrativu Baguia, kompanhia manan nain seidauk halo konstrusaun, tanba difikulta husi ponte Gomilafa.
Projetu konstrusaun nee rasik lansa fatuk dahuluk husi Ministru Obras Publikas no akompanha husi Prezidente Autoridade Munisipiu Baukau inklui Autoridade Postu Baguia, Autoridade Suku Samalari hetan akompanhiamentu masimu husi komunidade sira neebe realiza serimonia lansamentu fatuk dahuk iha loron 27 Marsu 2025.
“Ponte Samalaria nee Ministeriu Obras Publikas halo tiha ona lansamentu iha fulan hirak liu ba, kompanhia manan nain nee halo ona saint klining iha neeba, maibe Ponte Gomilafa difikulta kompanhia nee halo mobilizasaun, entaun konstrusaun seidauk hahu,” hateten Administrador Postu Baguia, Mario Xavier da Silva ba jornalista sira iha Vila Nova Baukau, Segunda (16/06/2025).
Projetu refere responsabiliza husi kompanhia MCC 20 Group Corp. LTD (China), numeru kontratu 009/MOP-2024 ho valor orsamentu US$ 4,025,624.71 neebe supervizaun husi Ministeriu Obras Publikas ba durasaun servisu fulan 12.
Nunee kompanhia MCC 20 Group Corp. LTD halo ona servisu limpeza iha terenu, no tuir planu atu kontinua halo konstrusaun ponte refere, maibe seidauk bele hahu, tanba ponte Gomilafa iha Suku Atelari, Postu Laga difikulta kompanhia mobiliza ekipamentus servisu ba iha terenu.
Autoridade Postu nee konfesa, bainhira ponte Gomilafa seidauk fo solusaun, projetu konstrusaun ponte refere sei la finaliza tuir kontratu neebe iha no kontinua difikulta ba movimentu transporte publiku diresaun Laga-Baguia, tanba dadaun iha Postu Administrativu Baguia udan kontinua akontese provoka mota Samalari prejudiika movimentu transporte no fo perigu ba komunidade sira neebe lao ain, tanba mota tun ho volume boot.
“Ba mota nee vitima balun lakon ona vida iha mota laran, aliende mos transporte hanesan motorizada balun mos mota lori, neebe iha ona vitima ba mota nee,” Mario Argumentu.
Nia deklara, kestaun mota Samalari difikulta movimentu transporte no fo impaktu ba komunidade lao ain sira, mak iha tinan nee Governu liu husi Ministeriu Obras Publikas preve orsamentu hodi kontratu kompanhia internasional refere halo konstrusaun, maibe seidauk akontese, tanba impaktu husi ponte Gomilafa neebe iha medida kloot la ajuda kompanhia mobiliza ekipamentus liu husi ponte refere.
Nunee husu ba Ministeriu Obras Publikas atu fo atensaun ba ponte Gomilafa, tanba aliende fo impaktu ba konstrusaun ponte inklui mos projetu reabilitasaun estada Laga-Baguia neebe responsabiliza husi kompanhia Norinco International Cooperation hodi mobiliza ekipamentus pezadu kontinua projetu reabilita estrada too Postu Baguia.
Enkuantu antes nee Project Manager Kompanhia Norinco International Cooperation, Song Long hateten, ponte Gomilafa difikulta mobilizasaun ekipamentus pezadu, tanba medida kloot, maibe kompanhia Norinco iha inisiativa atu halo manutensaun hodi fasilita servisu, maibe komunidade sira iha Suku Atelari la kopera, tanba razaun fatin lulik nunee limita kompanhia halao servisu.
Maibe Administrador Postu Laga, Administrador Postu Laga, João Freitas de Castro hateten, kestaun kompanhia Norinco neebe iha inisiativa hakarak halo manutensuan ba ponte Gomilafa, parte komapanhia rasik seidauk deklara, maibe parte Autoridade Postu sei aprosima kompanhia Norinco ho Autoridade Suku Atelari hodi responde.
“Ponte Gomilafa nee kondisaun la diak, tanba antigu nian, maibe komunidade neebe dehan lulik nee entemus Lia Nain, Suku, Postu, tuur hamutuk buka solusaun para rezolve problema nee,” hateten Administrador Laga.
Relasiona deklarasaun Project Manager Kompanhia Norinco International Cooperation Song Long, parte Autoridade Postu konsidera, maibe sei relata ba Ministeiru Obras Publikas hodi tetu, tanba dezenhu ba projetu reabilitasaun estrada Laga-Baguia la inklui ponte.
(tom)
