BAUKAU, STLTIMORLESTE.com – Deskonfia kareta fuzu husi kompanhia Norinco International Cooperation soke mate sidadaun Grasiano Antonio Ximenes iha Suku Sagadate, Postu Administrativu Laga, Munisipiu Baukau.
Xefe Suku Sagadate Aureliano de Jesus esplika, asidente refere akontese bainhira vitima konduz motorizada mio ho sapa matrikula Y.5179, diresaun husi Laga Vila ba rezidensia Aldeia Na’afa, Suku Sagadate, maibe too area Sagadate estrada diresaun Laga-Baguia, vitima hetan asidente rezulta mate fatin neebe deskonfia soke malu ho kareta fuzu ida husi kompanhia Norinco.
“Vitima mate liu, kareta kompanhia norinco nian mai husi Baguia, vitima mesak ho motor kareta sama nia ulun, vitima nee sei joven hela, idade foin kala seidauk too 20 karik,” informa Aurelino ba jornalista STL liu husi telefone, Segunda (16/06/2025).
Nia haktuir, akontese iha loron 16 Junhu, pur-volta tuku 05:00 loraik, bainhira vitima remata trata dokumentus iha Postu Laga, konduz motorizada refere husi diresaun Laga ba uma Na’afa, derrepente hetan asidente refere iha estrada publiku diresaun Laga-Baguia area Sagadate.
Nia sublina, daudaun Komando Polisia Munisipiu Baukau liu husi ekipa Polisia Tranzitu Baukau too ona fatin akontesimentu rekolha evidensia hodi hatene motivu ba asindente refere.
“Prosesu ba oin depende ba familia, maibe tuir lei krimi nee tenke prosesu tuir dalan legal,” Aureliano akresenta.
Too notisia nee publika, STL seidauk halo konfirmasaun ho Komandante Komando Polisia Munisipiu Baukau.
(tom)
