BAUKAU, STLTIMORLESTE.com – Komunidade husi uma kain aldeia rua (2) iha Suku Soba, Postu Administrativu Laga, Munisipiu Baukau, seidauk asesu eletrisidade.
Xefe Suku Soba, Fransisca Monica de Fatima Correia esplika, Suku Soba iha Aldeia haat kompostu Aldeia Eu-Uai, Betufalu, Laukua, Boleha, Asanunu no Fatiliri, neebe Aldeia Fatiliri no Asanunu too ohin loron seidauk asesu eletrisidade, tanba seidauk hetan instalasaun eletrisidade husi parte relevante sira.
“Total uma kain neebe seidauk asesu eletrisidade 100 resin iha aldeia rua, ami iha ona planu sei aprezenta mai munisipiu,” hateten Monica ba jornalista STL iha Vila Nova, Baukau, Sesta nee (20/06/2025).
Nia sublina, aldeia rua refere lo-loos asesu ona eletrisidade iha tinan hirak liu ba, maibe la realiza, tanba kauza husi la asesu estrada hodi fasilita kompanhia mobiliza ekipamentus servisu ba iha terenu.
Maibe preokupasaun estrada ba aldeia rua refere Autoridade Suku responde ona liu husi Orsamentu Programa Nasional Dezenvolvimentu Suku (PNDS) tinan 2024 besik atu finaliza.
Nunee Autoridade Suku sei esforsu halo levantamentu dadus detailhu ba uma kain sira, sei aprezenta ba Autoridade Munisipiu Baukau hodi solusiona, tanba komunidade husi Aldeia rua refere tinan naruk ona tempu kalan sunu lampurina hafoin hetan naroman.
“Ema hotu-hotu sente ona ukun aan nee, maibe sira neebe seidauk asesu sei triste, tanba sosa minarai, lilin, hodi uza iha tempu kalan,” Monica akresenta.
Xefe Suku Soba nee rekonhese, komunidade husi aldeia rua refere kontinua sunu lampurina iha tempu kalan, fo impaktu ba saude labarik sira nian, tanba tempu kalan bainhira labarik sira hakarak estuda utiliza lampurina neebe iha suar no provoka ba moras Infesaun Respiratoriu Aguda (ISPA).
Relasiona asuntu nee, Administrador Postu Laga, João Freitas de Castro hateten, sei halo koordenasaun ho parte Empreza Publiku Eletrisidade Timor Leste hodi responde, tanba enerjia eletrika importante ba komunidade sira atu asesu.
“Eletrisidade nee importante, ita haree komunidade balun asesu balun seidauk asesu, nee fo impaktu, tanba sobre informasaun iha televizaun sira la asesu,” João argumentu.
(tom)
