DILI, STLTIMORLESTE.com – Tribunal Judisial Primeira Instánsia Dili (TJPID) iha loron Sesta (20/06) halao julgamentu ba kazu agresaun fizika neebe komete husi arguida ho inisial EB, hasoru Lezada inisial AC iha merkadu Tabessi.
Tuir akuzasaun husi Ministeriu Publiku (MP) katak, iha loron 28 fulan Janeiru tinan 2023, iha dezentendimentu entre arguida inisial EB no lezada AC diskute malu kona-ba fatin faan sasan iha merkadu Taibesi.
No iha diskusaun nee lezada lori aisar dasa rai baku arguida EB nia liman, nunee arguida lori fila fali nuu kelen hodi tuda ba lezada nia oin laran, nune kona iha lezada nia matan fukun ikus mai rezulta kanek no raan.
Tanba nee MP akuza arguida komete krimi Ofensa Integridade Fizika Simples neebe previstu iha artigu 145 husi KP.
Iha sala julgamentu laran arguida la marka prezensa, tanba nee Tribunal deside hodi rona deklarasaun husi lezada.
Iha sala julgamentu laran lezada konfesa katak, arguida halo duni agresaun hasoru lezada. Reforsa tan ho sasin NJ katak, haree arguida halo duni agresaun ba lezada, too lezada nia matan kanek.
Rona tiha lezada no sasin, iha alegasaun Prokurador Pedro Baptista haree katak, arguida komete duni krimi, tanba nee husu ba Tribunal atu aplika prizaun fulan 6 suspende ba tinan 1.
Aleinde nee Defensor Publiku, Jose Maria Guterres husu Tribunal halo alterasaun husi agresaun fízika ba resiproka, tanba iha julgamentu nee lezada konfesa katak, sira nain rua arguida hakseluk maluk no baku.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz singular, José Escurial, Ministeriu Publiku reprezenta husi Prokurador Pedro Baptista, no arguidu hetan asistensia legal husi Defensor publiku, José Maria Guterres.
(ter)
