DÍLI, STLTIMORLESTE.com — Estudante ensinu superiór presiza aumenta esforsu estuda, lee livru no buka referénsia atu hasa’e kualidade aprendizajen no kompeténsia.
Reitór Institutu Siénsia Saúde (ICS), Leão Borges, hato’o apelu ne’e ba STL, Segunda-feira (12/10/2026), hodi enkoraja estudante sira atu prepara an ba kompetisaun iha nivel rejionál.
“Tanba Timor-Leste tama ona ASEAN, estudante sira presiza hakas an estuda, lee livru barak no aumenta kapasidade atu kompete,” nia dehan.
Nia esplika katak, estudante sira tenke estuda didi’ak matéria ne’ebé dosente sira hanorin kada loron, no aprofunda koñesimentu tuir área estudu ne’ebé sira hili.
Borges dehan katak, Timor-Leste nia adezaun ba ASEAN lori dezafiu foun ba instituisaun ensinu superiór, liuliu iha preparasaun rekursu umanu ho kualidade.
“Kompetisaun entre instituisaun ensinu superiór iha Timor-Leste no rai li’ur sei iha, tanba ne’e, kapasitasaun ba dosente sira importante tebes,” nia afirma.
Nia subliña katak, kapasitasaun ba dosente bele ajuda aumenta koñesimentu no hadi’a kualidade ensinu, hodi prepara estudante sira atu hasoru kompetisaun.
Estudante Farmásia, Josefina Martins, konkorda katak estudu iha universidade presiza esforsu boot liu duké iha ensinu sekundáriu.
“Haree ba estudu iha universidade, ita presiza lee barak, halo tarefa no buka referénsia atu komprende matéria ne’ebé dosente sira fó,” nia deklara.
Nia esplika katak, estudante universidade enfrenta tarefa barak, nune’e presiza dedika tempu atu lee no komprende matéria ida-idak.
Estudante Enfermagem, Mariano Nunes mós hatete katak, aprendizajen iha área saúde la’ós teoria de’it, maibé presiza prátika atu dezenvolve abilidade profisionál.
“Iha área saúde, ita la’ós aprende teoria de’it, maibé presiza prátika mós. Tanba ne’e, ita tenke kontinua aprende buat barak,” nia komenta.
Nunes enkoraja estudante sira atu lee livru no buka koñesimentu tuir área ne’ebé sira hili, hodi prepara an ba nesesidade servisu iha futuru.
(jac)
