DILI, STLTIMORLESTE.com – Komando FALINTIL – Forsa Defeza Timor Leste (F-FDTL) daudaun nee iha ona Pilotu Forsa Armada nain 30 resin, maibe Instutisaun F-FDTL seidauk iha aviaun ba sira atu lori.
Nia dehan, Komponente Aéreo iha ona nain 30 resin mak remata ona sira nia formasaun ba pilotu no mekaniku iha nasaun Filipina foin fila ona mai Timor Leste, maibe sira nee labele aplika saida mak sira hetan ona, tanba F-FDTL seidauk aviaun.
“Pilotu iha nee 30 resin, sira ba tuir formasaun ona iha Filipina mai kedas ho pakote ida, soke mai laiha okupasaun buat ida,” hatete Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” ba jornalista sira iha nia knaar fatin Kuartel Jenerál F-FDTL Fatuhada, Dili, Sesta(20/06/2025).
Nia tenik, agora iha ona Pilotu no mekaniku nain 30 resin, maibe aviaun ba sira mak seidauk iha atu lori, maibe espera se iha ba futuru nian.
Iha fatin hanesan, Komandante Komponente Aéreu, Tenente Koronel Helder da Costa informa, iha ona membru F-FDTL nain 30 neebe remata ona formasaun kona-ba pilotu no mekaniku nian, sira bele lori ona aviaun kiik no helikopteru sira.
“Ita nia pilotu iha nee nain 30 neebe preparadu ona atu lori hanesan helikopteru sira nee, maibé estadu oferese ba ita hanoin membru efetivu iha para atu lori,” nia afirma.
(jen)
