DILI, STLTIMORLESTE.com – Tribunal Judisial Primeira Instansia Dili liu husi leitura akordaun, deside kondena arguidu ho inisial JRX ho pena prizaun tinan 30, tanba konsidera provadu ba iha krimi neebe hasoru lezada BJ nuudar arguidu nia feen.
Iha desizaun nee Tribunal tetu deklarasaun husi arguidu no sasin nian, no ikus mai koletivu deside hodi aplika pena unika tinan 30 ba iha arguidu, ho razaun provadu hotu ba iha krimi neebe konsta iha akuzasaun.
Iha desizaun nee Tribunal mos esplika, atu arguidu la konkorda bele liu husi arguidu nia defeza halo rekursu.
Antes nee iha alegasaun Prokuradora Bemvinda do Rozario mantein ho akuzasaun neebe iha, hodi solisita ba iha Tribunal koletivu atu aplika prizaun tinan 25 ba iha arguidu.
Enkuantu Defeza, Laura Valente husu Tribunal atu absolve arguidu, razaun tanba bazeia ba relatoriu husi mediku hatudu katak, arguidu sofre hela moras no kondisaun la hanesan ema baibain.
Tanba nee defeza haree katak la iha kondisaun atu kondenan arguidu neebe ho kondisaun moras hela. Tanba nee ho desizaun Tribunal nian kondena arguidu ho pena prizaun tinan 30, defeza la konkorda no sei halo rekursu hasoru desizaun nee.
Ba prosesu ida nee, prezide husi Juiz Koletivu, Arjentino Nunes, Ivan Patrocinio Antonino no Zulmira Auxiladora, Ministeriu Publiku reprezenta husi Prokuradora Benvinda Do Rosario, arguidu hetan asistensia legal husi Defensora Publika, Laura Valente.
Tuir akuzasaun neebe mai husi Ministeriu Publiku katak, arguidu JRX ho lezada BJ nuudar feen ho laen no sira iha oan nain 2 ho idade menoridade.
Iha loron 20 fulan Outubru 2024, oras tuku 01:00 madrugada, iha Dili, ho razaun neebe la klaru, arguidu hodi tudik sona lezada hamutuk dala 13, iha lezada nian kakorok dala 4, sona mos iha lezada nia liman parte los dala 1, no arguidu hodi tudik koa lezada nia liman parte los besik kotu, sona tan iha lezada nian kanotak dala 1, sona iha lezada nian hirus matan dala 1, sona iha lezada nian kalilin dala 1, sona iha lezada nian brasu parte los dala 1, sona iha lezada nian knosen parte los dala 1, sona iha lezada nian kotuk laran dala 2, neebe rezulta lezada kanek todan.
Depois de arguidu sona tiha lezada, arguidu mos hodi tudik neebe nia kaer sona fali ba nian hirus matan dala 1, kalilin no kakorok hodi rezulta kanek.
Hafoin testemunha AJ rona lezada hakilar, nunee testemunha halai ba haree kondisaun lezada ho arguidu neebe kanek todan hotu, nunee testemunha halai ba estrada hakilar hodi husu ajuda, no vizinhu sira rona hodi ba too iha fatin, no testamunha kontinua halai ba eskuadra Polisia hodi hatoo informasaun.
Kuandu polisia too iha lokal krimi, lezada mos iis kotu no mate, nunee polisia halo kedas detensaun ba arguidu no apreensaun ba objetu utilizadu.
Iha altura neeba lezada ho kondisaun gravida ho fulan 7 liu, neebe prediksaun katak, lezada sei partus iha fulan Dezembru, maibe iha kalan akontesimentu lezada sente kanotak moras ona, nunee halo arguidu deskonfia no hirus hodi sona lezada dala barak halo lezada mate.
Arguidu JRX komete krimi nee ho voluntaria, livre no konsientemente, arguidu ho intensaun hasai lezada nia vida, utiliza tudik hodi sona dala barak ba lezada nia isin lolon neebe ikus mai rezulta lezada mate, no arguidu hatene katak nia hahalok nee kontra lei, maibe arguidu halo nafatin.
Konstitui arguidu JRX kanesan autoria ba material ba konkursu krimi 2, omisidiu Agravadu konjuga ho violensia doméstika no mos utilizasaun Arma Branka neebe previstu no punidu tuir artigu 139 pontu G no H husi Kodigu Penal, konjuga ho artigu 3 pontu A ho 35 pontu B hotu-hotu husi Lei n.7/2010, loron fulan Julhu, Lei Kontra Violensia Domestika, konjuga ho artigu 2 no pontu G no mos artigu 20 numeru 1 hotu-hotu husi Lei n. 5/2017, loron 19 fulan Abril kona-ba Rejime Juridiku Relativu Pratika Arte Marsiais, Rituais, Arma Branka rama ambon iha alterasaun Kodigu Penal.
Hatan ba akuzasaun nee, iha sala julgamentu laran Juiz prosesu konfirma ba iha arguidu maibe arguidu la koalia ho ibun. Tanba nee Tribunal uza deit maneira neebe arguidu bele halo mak Tribunal konfirma arguidu hatun ho doko ulun.
Tribunal konfirma kona-ba motivu akontese problema keta iha mosu diskonfia, arguidu mos hatan. No Tribunal konfirma kona-ba sona lezada dala barak arguidu mos rekonhese no hatan.
Arguidu mos hatudu ba Tribunal kona-ba kanek neebe arguidu sona aan rasik, hanesan arguidu lori tudik sona aan iha kalilin hirus matan no kakorok.
Tribunal bolu arguidu hamriik iha oin hodi konfirma kona-ba fotografia husi arguidu nia feen nian, arguidu mos hamriik ba iha oin hodi haree no hamonu matan-been.
Arguidu rekonhese oras nee daudaun arguidu iha oan nain rua mak iha hela liur, no hela ho familia sira.
(ter)
