DILI, STLTIMORLESTE.co – Ministeriu Edukasaun (ME) liu husi Diresaun Nasional Rekursu Umanu hamutuk Komisaun Funsaun Publiku (KFP) no Institutu Nasionál Seguransa Sosiál (INSS) identifika ona dadus profesores moras prelongada nain 9 iha RAEOA.
Lia hirak nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Tersa nee (24/06/2025).
“Kona-ba atu foti dadus moras prelongada iha Munisipiu Manufahi agora sei udan hela ami seidauk ba, maibe iha Oekusi mak hotu ona, nee duni Oekusi nian ami foin fila horseik, Oekusi nian ami foti ona profesores moras prelongada hamutuk nain 8, nain 3 desizaun sai ono, nain 6 mak Sesta nee ami halo ona, iha tempu badak ami sei hasai desizaun ida fo ba sira,” katak nia.
João hatutan, nee duni tekniku sira foti ona dadus profesores moras prelongada iha munisipiu haat mak hotu ona, nee mak hanesan Munisipiu Likisa, Baukau, Manatuto no RAEOA, maibe tuir planu sei ba tan Munisipiu Manufahi.
“Baukau iha 30 resin, neebe agora sei prienxe hela rekezitus balun, depois sira submete mai, ami hatoo fali iha komisaun, depois husi komisaun entrega ba INSS hodi hasai desizaun hanesan ho Likisa ninia, Manatuto mos hanesan fo esplikasaun ba sira, agora sei prienxe hela rekezitus balun tuir lei INSS nian, nee duni 40 resin mak identifika ona, tuir planu sei ba verifika iha Munisipiu Manufahi,” nia esplika.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintão hatete, profesores neebe mak moras prelongada nee dadus haruka ba ona iha rekursu umanu nasional.
“Kona-ba ita nian profesores neebe moras prelongada nee ita haruka ona dadus ba ita nian rekursu umanu nasional ME nian atu bele haree asuntu ida nee, nee duni ita nian profesores iha eskola balun neebe ho kondisaun moras, sira la ativu hanorin ita nian estudantes iha eskola,” nia haktuir.
(jac)
