DILI, STLTIMORLESTE.com – Komando Polisia Munisipiu Vikeke liu husi rekolha gravasaun Close Circuit Television (CCTV) identifika ona autor ida ba kazu soe bebe iha ponte tara (ponte gantung) mota Kuha, Suku Karaubalu, Postu Administrativu Vikeke.
Komandante Komando Polisia Munisipiu Vikeke, Superintendente António Rego Fernandes esplika, hafoin akontese soe bebe mane ida iha ponte refere, Komando Polisia Munisipiu Vikeke liu husi ekipa investigasaun rekolha CCTV husi loja sira neebe lokaliza besik ponte refere no konsege hetan faktus balun.
“Ita hetan duni ema balun iha neeba, maibe ita la konhese, tanba taka nia ulun. Maibe informasaun nafatin tama, ita konfirma nafatin informasaun nee para iha realidade,” hateten António Rego Fernandes ba jornalista STL liu husi telefone, Tersa (24/06/2025).
Komandante nee sublina, faktus liu husi CCTV neebe Polisia Munisipiu Vikeke rekolha, asaun soe bebe refere involve sidadaun mane ida, maibe seidauk konhese klaru, tanba falun ulun metin.
Nia fundamenta, mezmu sidadaun refere falun ulun metin, neebe liu husi gravasaun CCTV oin la konhese, maibe Komando nafatin buka tuir tanba iha ona informasaun, tempu besik bele dektekta hodi submete ba investigasaun.
“Ema nee ita haree hanesan mane, agora ita sei buka tuir hela para hatene lo-loos nia nee se, maibe informasaun neebe tama ita deskonfia ema iha nee, ita orienta ona intelejen buka tuir,” António Rego Fernandes akresenta.
Komandante Munisipiu nee deklara, kazu refere rejistu ona iha Ministeriu Publiku no asaun soe bebe mane refere too mate, nee konsidera krimi omisidiu, nunee sidadaun neebe komete tenke responsabiliza bainhira liu husi servisu intelejensia detekta nia paradeiru.
Nia argumentu, aleinde servisu intelejensia sira halao nia servisu, Autoridade Seguransa mos halo ona kooperasaun masimu ho Autoridade Suku inklui joven no komunidade sira kontinua fo informasaun ba malu relasiona kazu refere, nunee sei detekta autor ba asaun refere hodi prosesu tuir dalan legal.
Entretantu kazu soe bebe nee akontese iha loron 15 Junhu, pur volta tuku 08:00 dader, iha ponte Vikeke Vila, hetan husi sidadaun joven feto inisial T.A, idade 18, bainhira T.A ba mota refere objetivu atu fase ropa, derepente hetan bebe nee no T.A hakfodak fila kedas ba uma hodi fo hatene ba nian inan aman too iha fatin haree bebe nee no halo kedas kontaktu polisia hodi too kedas fatin evakua bebe refere ba Hospital Vikeke, maibe la konsege salva no Governu liu husi Ministeriu Solidariedade Sosial no Inkluzaun haloot ona iha semiteriu St Cruz Vikeke.
(tom)
