VEMASI, STLTIMORLESTE.com – Sentru Saude Vemasi, Munisipiu Baukau hahu estabelese triajen iha pontu variante areadores sentru saude nian hodi prevene surtu Covid-19.
Interinu Xefe Sentru Saude Vemasi, António Pereira esplika, relasiona karta sirkular husi Ministeriu Saude (MS) kona-ba prevene surto Covid-19, Sentru Saude Vemasi hetan ona orientasaun no daudaun Xefe Sentru Saude tuir hela formasaun kona-ba prevensaun surtu Covid-19 nian hafoin kontinua implementa medida iha nivel postu tuir orientasaun husi nivel nasional.
“Iha nee ita hein deit, maibe ita nia prosesu neebe mak uluk ita halao iha Covid-19 agora ita lao daudaun iha oin tama mai iha ona meza triajen, quer dizer deteksaun primeiru husi neeba,” hateten António Pereira ba jornalista STL iha nia knaar fatin Vemasi, Tersa (24/06/2025).
Nia sublina, triajen prevene Covid-19 iha Sentru Saude funsiona hahu husi fatin inisiu rejistu pasiente no aplika medida uza maskra no seluk tan mak kria distansia iha meza inisia rejistu pasiente.
Nia fundamenta, daudaun Xefe Sentru Saude tuir hela formasaun iha nivel munisipal no planu sei aplika medida prevensaun too iha nivel suku sira iha Postu Vemasi tuir medida anterior, tanba surtu Covid-19 perigu ba ema nia vida.
“Ita hatene katak virus nee ameasa ba ema nia vida, nasaun hotu rona virus nee tauk, iha Timor ami pesoal saude sira nafatin esforsu servi povu ida nee,” António Pereira argumentu.
Interinu nee akresenta, molok surtu Covid-19 invade iha Timor Leste, pesoal saude sira iha Postu Vemasi sei esforsu makaas liu husi sosializasaun ba Autoridade Suku sira, lider igreja no entidades relevante seluk iha Postu Vemasi hodi koopera ho servisu saude halo prevensaun masimu.
(tom)
