VEMASI, STLTIMORLESTE.com – Fundasaun Sentru Feto Haburas Dezenvolvimentu (F-CFHD – sigla português) kapasita grupu feto Kaikua iha Postu Administrativu Vemasi, atu transforma sukaer ba rebusadu kompete iha merkadu lokal.
Diretora Ezekutivu F-CFHD, Teresa Pereira esplika, F-CFHD nuudar Organizasaun Naun Governamental neebe sai parseiru ba Governu hodi dezenvolve grupu kiik sira iha Munisipiu Baukau bele iha kapasidade partisipa iha prosesu dezenvolvimentu nasaun nian.
Tanba nee Governu liu husi Gabinete Apoiu Sosiedade Sivil apoiu fundus ho valor rihun US$ 15, nunee F-CFHD foti inisiativa kapasita grupu feto iha Suku Kaikua, Postu Vemasi, objetivu atu dezenvolve produtu lokal sira ba produtu modernu kompete iha merkadu lokal hadia ekonomia familia.
“Atividade ohin loron nian ami fo treinamentu ba grupu feto iha Suku Kaikua oinsa transforma Sukaer sai rebusadu Sukaer,” hateten Tereza ba jornalista sira iha Kaikua, Vemasi, Tersa (24/06/2026).
Nia sublina, formasaun tranformasaun sukaer ba rebusadu importante tebes ba grupu feto iha Suku Kaikua, tanba Postu Vemasi potensialidade ba sukaer, maibe komunidade laiha konhesimentu halo transformasaun sai rebusadu hodi faan iha merkadu lokal sira.
Maibe prezensa F-CFHD sai esperansa ba gurpu feto Kaikua, tanba bele hetan formasaun hodi transforma sukaer ba produtu rebusadu neebe iha valor ekonomika bele ajuda rendimentu ekonomia familia.
“Produsaun nee importante, Sukaer ita han deit nia sin, maibe mistura fali ho fehuk, ailia, aimanas no masi-midar tein hamutuk sai rebusadu sukaer iha valor ekonomia bainhira faan hetan rendimentu,” Tereza akresenta.
Autoridade Lokal Domingos Gusmão da Costa sente orgulhu ho prezensa ekipa F-CFHD iha Suku Kaikua, tanba bele motiva feto potensial sira hodi transforma sukaer neebe durante nee laiha folin diak iha merkadu lokal sira.
“Vemasi potensial ba Sukaer, durante nee ami hili mai hamoos depois falun iha plastik ba faan deit, maibe halo ba rebusadu seidauk iha, tanba nee liu husi formasaun nee bele transforma ekonomia familia,” katak Domingos Gusmão da Costa.
Reprezentante Grupu Feto Hadia Moris, Norberta da Costa espresa sentimentu agradese ba Governu liu husi apoiu ba F-CFHD inisia formasaun hodi transforma produtu sukaer neebe konsidera laiha folin iha merkadu ba produtu rebusadu hodi faan sustenta ekonomia familia.
“Ami agradese ba F-CFHD tanba fo ona formasaun mai ami kona-ba transformasaun Sukaer ba produtu rebusadu sukaer, nunee ami ba faan fali hetan osan ajuda familia lori oan sira ba eskola,” Norberta da Costa espresa.
Entretantu F-CFHD iha tinan 2024 apoiu ona formasaun hanesan ba grupu feto kompostu nain 20 iha Suku Kaibada, Postu Baukau Vila no tinan 2025 fasilita formasaun hanesan ba Grupu Feto Hadia Moris iha Suku Kaikua kompostu ema nain 20 neebe fahe ba faze rua, faze dahuluk realiza iha fulan Junhu involve ema nain 10 no fulan Julhu sei fasilita tan formasaun hanesan ba nain 10 husi grupu hanesan.
(tom)
