DILI, STLTIMORLESTE.com – Komisaun Anti Korupsaun (KAK) notifika governante ida ho inisial EdSP presta deklarasaun iha KAK, ligadu ho prosesu balu.
“Kazu neebe mak iha Sekretaria Estadu Igualidade Inkluzaun, hau hanoin prosesu nee ami notifika sira lubuk boot ida, agora sese mak atu asumi responsabilidade nee mak sei konstitui sai arguidu,” dehan Komisariu KAK, Rui Pereira ba jornalista sira iha Farol, Tersa (24/06/2025).
Nia dehan, atu konstitui ema ida sai arguidu nee tenke iha provas mai husi provas dokumental, sasin sira no mos mai husi ema nain rasik sira neebe envolve atu konfesa sira halo ka lae.
Servisu KAK nian atu notifika sidadaun sira tantu nia funsionariu ka ema boot liga ho prosesu normal iha KAK nee, se ita nia membru Governu mai presta deklarasaun konserteja sira simu notifikasaun husi KAK atu mai fo informasaun liga ho keixa neebe mak iha,” Komisariu esplika.
Nia hatutan, membru Governu neebe presta deklarasaun iha KAK, delegasaun simu halao tuir kompetensia neebe KAK iha.
Esplika, KAK investiga kazu sira nee liga ho ita nia membru Governu sira deskonfia, komete krimi falsifikasaun dokumentus ka utiliza sasan balu la tuir nia regra, ida nee investigasaun mak sei hatudu no prosesu nia lao ba oin oinsa.
Reforsa, iha kargu xefia balu sei hamutuk iha prosesu nee nia laran, no sira neebe posibilidade bele sai arguida ka arguidu nee bele iha ema nain rua nain tolu ka nain haat, konforme prosesu nee mak sei hatudu. Tanba KAK sei rekolha hela informasaun liu husi deklarasaun sira neebe mai fo, husi ida nee mak KAK sei halo analiza prepara relatoriu final sei submete ba iha Ministeriu Publiku, no iha relatoriu final mak ita foin hatene didiak, ema hira mak sei konstitui sai hanesan arguidu.
Hatan kona-ba prazu ba investigasaun, Komisariu dehan, normalmente tuir delegasaun neebe mai iha prazu loron 30 ka loron 60 no mos loron 90, hodi konklui informasaun.
Tuir observasaun STL nian iha terenu, membru Governante nee too iha KAK maizumenus oras tuku 8 resin, akompanha ho advogadu ida.
Depois iha oras besik tuku 11 resin, Governante nee sai husi edefisiu KAK. Governante nee hiit pasta kiik ida, hatais vestidu ida.
(ter)
