DILI, STLTIMORLESTE.com – Ministeriu Soliedariedade Sosiál no Inkluzaun (MSSI) sei halao pagamentu programa Bolsa da Mãe kondisional ba estudante sira iha teritoiu laran, ba faze dahuluk hamutuk nain 40.279 iha fulan Julhu tinan nee.
Ministra Solidariedade Sosiál no Inkluzaun (MSSI), Verónica das Dores hatete, Programa Bolsa da Mãe Kondisionál nuudar programa Governu nian neebe kontinua implementa hahu husi tinan 2008 bazeia ba dekretu lei númeru 18/2012, de 4 de Abril. Dekreitu lei Ida nee hetan alterasaun iha fulan Janeiru 2024 tuir dekretu lei númeru 1/2024, de 3 de Janeiro hodi halo mudansa ba montante orsamentu ba estudante benefisiáriu sira iha Dekretu Lei anteriór iha artigu 10 no artigu 11.
Subsidiu Bolsa da Mãe kada fulan ba estudante benefisiáriu sira mak hanesan, estudante sira husi Ensinu Báziku siklu dahuluk no daruak US$ 8.00, estudante sira husi Ensinu Báziku siklu datoluk US$ 9.00, estudante sira husi Ensinu Sekundáriu Jerál no Tékniku Vokasional US$ 10.00, no estudante sira ho defisiénsia sei hetan tan orsamentu adisionál US$ 5.00.
“Ohin loron 24 Junhu 2025, MSSI aprova lista benefisiáriu sira neebe elijivel ba pagamentu faze dahuluk neebe ita sei halao dentro de fulan Julhu 2025, ba tetu orsamentu 2025, orsamentu neebe MSSI aloka ba Bolsa da Mãe Kondisionál ho montante US$ 7,000,080.00,” hatete Ministra Solidariedade Sosial no Inkluzaun (MSSI), Veronica das Dores liu husi Konferensia Imprensa iha Edifisiu MSSI Kaikoli, Tersa nee (24/06/2025).
Tanba nee bazeia ba montante orsamentu nee MSSI sei halo pagamentu ba faze dahuluk nian ho montante orsamentu US$ 4,199,708.00 ba estudante benefisiáriu sira ho total 40,279.
Klasifikasaun estudante benefisiáriu sira ba pagamentu dahuluk tuir nivel ensinu mak hanesan, Ensinu Báziku Siklu dahuluk no daruak, total benefisiariu 20.178 ho total orsamentu US$ 1.952.866.00, Ensinu Báziku Siklu datoluk total benefisiariu 14.994.864.00 ho total orsamentu US$ 1629. 864.00 no Ensinu Sekundáriu Jerál no Tékniku Vokasionál total benefisiariu 5,107 ho total Orsamentu US$ 616,978.00.
Tanba nee MSSI fo hatene ba públiku katak hahu iha 1 de Julhu 2025, MSSI sei halo rejistu foun ba tutor no benefisiariu estudante sira iha teritóriu Timor Leste, no sei halo pagamentu ba benefisiariu sira nee ba faze daruak nian iha trimestre ikus 2025.
MSSI husu ba familia benefisariu sira se pagamentu iha fulan Julhu nee mak naran laiha ka la konsege simu, bele hatoo reklamasaun mai MSSI atu nunee MSSI bele ajusta ba pagamentu faze daruak nian neebe sei halao iha trimestre ikus 2025, nunee lista benefisiáriu ba Bolsa da Mãe Kondisionál 2025 ba faze dahuluk nian aprovadu.
(joa)
