DILI, STLTIMORLESTE.com – Sekretariu Estadu ba Igualdade (SEI) ho parseiru sira neebe luta ba direitu feto no labarik presiza servisu makaas, nunee bele prevene violensia domestika neebe feto no labarik hasoru.
Sekretaria Estadu ba Igualdade, Elvina Sousa Carvalho ba jornalista sira iha Hotel Timor, Tersa (24/06/2025) hatete, Violensia Domestika neebe feto no labarik sira hasoru nee problema sosial, tanba nee Governu liu husi SEI no parseiru presiza servisu makaas hodi bele prevene.
Oras nee daudaun iha lei violensia kontra feto no labarik feto mos adopta ona iklui lei oin-oin neebe proteje direitu, maibe realidade hatudu numeru kazu violensia domestika kontinua aas iha tribunal, ida nee impkatu husi saida? No saida mak parte Governu liu husi SEI no parseiru sira halo? Hatan ba kestaun nee Sekretaria Estadu ba Igualdade hatete, ida nee mak realidade moruk neebe akontese no parte SEI ho parseiru esforsu makaas hodi bele halo sosializasaun nunee bele muda ema nia mentalidade.
“Violensia no problema neebe mak akontese nee problema sosial no problema neebe presiza hetan atensaun seriu, SEI hamutuk ho nia parseiru sira inklui ministeriu sira neebe mak iha prontu halo mitigasaun ba problema sira nee, ita iha lei, ita iha sistema neebe mak diak hodi bele fo resposta ba kazu sira nee, maibe kazu kontinua akontese beibeik, signifika Sekretaria Estadu Igualdade nia parseiru tenke servisu makaas ho sosializasaun nunee muda ema nia mentalidade,” dehan SEI.
Sekretaria Estadu ba Igualdade hatete, Governu liu husi SEI hamutuk ho parseiru sira kontinua servisu makaas liu husi sosializasaun, nunee bele muda ema nia hanoin no mentalidade sira nunee bele redus numeru violensia ba feto no labarik sira.
“Nunee mos advokasia mos kontinua lao nafatin, nee realidade moruk neebe iha maibe Sekretariu Estadu ba Igualdade ho parseru nafatin halo servisu atu bele redus problema sosial neebe iha,” dehan SEI.
Nunee mos Eis Prezidente Rede Feto, Judite Dias Ximenes hatete, ohin loron numeru kazu violensia domestika kontinua aumenta iha tribunal, tanba komunidade liu-liu feto sira hatene ona katak violensia domestika nee laos bikan no kanuru mak tarutu maibe nee krimi publiku, tanba nee sira hatoo keixa nunee autor sira bele simu konsiensia ba hahalok neebe sira halo.
“Uluk numeru ladun barak tanba konsidera katak baku feto tanba hadomi, no baku tuku tebe konsidera bikan ho kanuru mak tarutu, maibe ohin loron ho sosializasaun husi Rede Feto ho parseiru sira loke ona ema nia hanoin katak violensia domestika nee krimi publiku laos bikan no kanuru mak tarutu,” katak nia.
Nia hatete, Governu liu husi ministeriu relevanten nomos organizasaun neebe mak luta ba direitu feto la para hodi halo sosializasaun hodi fo hanoin ba komunidade sira katak violensia domestika nee krimi publiku, tanba nee bainhira akontese violensia ruma labele nonok maibe hatoo ba keixa iha parte relevante.
Nia mos husu ba publiku bainhira hetan kazu violensia domestika iha familia ka sosiedade nia leet labele haree deit maibe bele hatoo mos keixa ba iha polisia ka ministeriu relevante sira, tanba kazu violensia domestika nee krimi publiku, ema neebe hetan bele hatoo keixa.
(eme)
