DILI, STLTIMORLESTE.com – Oras nee daudaun kondisaun sala neen (6) iha Ensinu Báziku Filial (EBF) Vila Verde presiza halo reabilitasaun.
“Iha duni ami nian sala de aula neebe mak ninia kondisaun ladun diak, maibe ami labele halo buat hotu, tanba buat hotu sei liu husi manutensaun, maibe nee natoon tebes, ami tenke halo uluk ida neebe mak nesesidade liu, nee duni sala de aula seidauk bele book, tanba kondisaun sala de aula neen nee kuaze atu hanesan, nee duni ba oin presiza halo reabilitasaun ba ami nian sala de aula, neebe agora daudaun ninia kondisaun ladun diak, lo-loos nee eskola ida nee halo reabilitasaun,” afirma Koordenadora EBF Vila Verde, Filomena Casmira ba jornalista STL iha nia knaar fatin Vila Verde, Kuarta nee (25/06/2025).
Nia dehan, nee duni orsamentu neebe mak atu uza ba iha manutensaun nee sira sei rezolve uluk bee dalan, bainhira udan boot bee nalihun deit iha fatin, ho ida nee nuudar lideransa iha eskola ida nee, maske ho osan neebe kiik maibe buka meus para bele hadia bee dalan.
Iha fatin seluk, Diretor EBC Fatumeta, Cornelio S. dos Santos dehan, sala neebe mak plafon aat, ninia janela aat no buat seluk neebe mak ohin mensiona nee ladun seguru ba estudantes sira, liu-liu iha tempu udan no anin boot, maibe sira nafatin uza konsiensia para nunee prosesu aprendizajen lao diak hanesan baibain.
“Sala sira nee tuir lo-loos ita la merese atu uza ona, tanba iha risku boot ba ita bainhira tempu udan no anin boot, nee fo risku ba profesores no estudantes sira, nee duni ita nian kondisaun mak hanesan nee, ami mos hatoo ami nian konstrusaun neebe mak agora aat, ami hatoo ona ami nian karta ba MinisteriuEdukasaun, parte infraestrutura nian, espera katak sira bele tun mai haree ami nian kondisaun sala neebe daudaun nee sei aat hela,” dehan nia.
Nunee mos Diretor Diresaun Nasional Infraestrutura no Edukativu iha Ministeriu Edukasaun, Helio Lopes hatete, iha orsamentu konsentra ba iha sala de aulas pur volta US$ 1000 resin, neebe mak too agora iha kondisaun aat, presiza konsentra orsamentu ba rezolve kondisaun sala de aulas, tanba sala de aulas mak hanesan fasilidade importante tebes-tebes, hodi bele apoiu ensinu aprendizajen direitamente iha kada eskola.
(jac)
