DILI, STLTIMORLESTE.com – Polisia Nasionál Timor Leste (PNTL) liu Ekipa Konjunta Kompostu husi Servisu Informasaun Polísia nian, Servisu Informasaun husi Militar, Servisu Informasaun husi Nasional (SNI) detein ona suspeitu naokten nain hitu (7).
Nia dehan, iha loron 16 fulan Junhu 2025, wainhira akontese kazu naok, sobu loja Xina nian ida iha area Fatuhada, nunee ekipa konjunta halo kedas servisu rápidu, halo tracking ba kriminozu sira neebe envolve iha kazu ida nee.
Nia hatete, hafoin halo identifikasaun, Polísia Investigasaun Eskuadra Dom Aleixo aprezenta ba Ministeriu Públiku (MP) no horiseik (24/06/2025) hetan Mandadu Detensaun husi Tribunal Distrital Dili no halo kedas Operasaun Imidiata ba suspeitu sira.
“Nunee suspeitu nain hitu (7) horiseik ita detein no agora daudaun iha Sela Polísia Eskuadra Dom Aleixo, suspeitu sira nee ho inisial DGJ, YGKS, Ka Edi, SF, DP, ASG, ADV,” hatete Portavoz Komando Polísia Nasional Timor Leste (PNTL), Superintendente Polísia João Belo dos Reis ba jornalista sira liu husi konferensia imprensa iha nia knaar Komando Jerál PNTL, Dili, Kuarta (25/06/2025).
Nia esplika, suspeitu hirak nee konsidera suspeitu Króniku sira, suspeitu sira neebe sai tama halo asaun krimi beibeik, hafoin sai husi komarka halo nafatin no wainhira hetan libertasaun husi Tribunal sira kontinua komete nafatin krimi.
“Suspeiru sira nee rasik bolu sira nia aan katak NAKRO katak Naok Ten Króniku, suspeitu sira ba kazu nee nain rua mak ita sei halo tracking nafatin, maibe PNTL ho ninia parseiru sira sei la fo oportunidade ba naok sira hanesan nee atu eziste iha ita nia rain laran, tanba ami tenke garante hamutuk ho ami nia parseiru sira, tenke garante nasaun ida neebe seguru ba ita nia komunidade sira,” nia informa.
Nia deklara tan katak, husi nain sia (9) neebe envolve iha kazu ida nee, nain rua (2) iha hela tracking laran, PNTL sei buka tuir atu bele responde iha meza Tribunal nian. Kazu nee rasik rejista ho NUC 0413/2025 Dom Aleixo nian.
“Ita sei aprezenta hotu ba sira neebe envolvidu karik iha deklarasaun sira halo, balun sei partisipa, ema ruma haruka, ita sei husu hotu sira nia responsabilidade perante Lei,” nia hatutan.
Nia koalia, uza oportunidade ida nee hakarak apela ba inan-aman sira, inan-aman husi alin (kriminozu) sira neebe mak envolve iha kazu ida nee atu kuidadu nia oan sira, atu buka tuir sira iha neebe, karik alin sira kaer osan barak ruma, sae motor derepente karik inan-aman la hola tenke buka tuir.
“Labele inan-aman mak kontente fali ho oan sira nia rezultadu krimi, entaun inan-aman kontribui hotu ba oan sira nia aktu, tanba nee husu nafatin ba inan-aman sira atu kuidadu, husu mos ba komunidade enjerál, autoridade lokal sira atu koopera ho Polísia hodi bele informa karik identifika aktu ka krimi ruma akontese iha ita boot sira nia area, informa dereita ba Autoridade Polísia iha Postu, iha Ofisial Suku sira atu nunee ita atua iha tempu neeba kedas,” nia haktuir.
Iha fatin ketak, Akademista UNTL. Adérito da Silva informa, PNTL kaer ona naokten hanesan nee tenke investigasaun klean no prosesu tuir lei neebe vigor iha Timor Leste.
“Ita labele kaer depois husik deit, depois rezultadu mak sira hanesan nee, tanba sira hanoin hau ba naok mos polisia kaer hau husik deit, entaun sira naok too naok profisional, ita labele haki’ak ema naokten iha ita nia rain,” nia afirma.
(jen)
