DILI, STLTIMORLESTE.com – Institutu Nasionál Farmasia Produtu no Medikamentu (INFPM) rekonhese kona-ba manipulasaun presu kompras aimoruk, neebe daudaun nee viral iha media sosial.
Nia dehan, kona-ba isu neebe sai viral ona media sosial iha horiseik nee, tanba iha Kompanhia Salimagu mak atu kompras aimoruk ho karakter emerjensia, tanba iha hospitál no fasilidade saude sira stock out, nunee INFPM estabelese kontratu ho kompanhia Salimagu maibe iha falhansu administrativu, tanba nee kompanhia refere la konsege kompras aimoruk.
“Liga ba isu neebe agora daudaun espalha iha públiku katak, iha manipulasaun ba presu los duni isu nee ami rekonhese, maibe ami presiza fo klarifikasaun katak, ida nee hanesan falhansu administrativu ida neebe ami mos la espera,” hatete Diretór Interinu Institutu Nasionál Farmasia Produtu no Medikamentu (INFPM), Miguel Soares ba jornalista sira iha nia knaar fatin INFPM Kampung Alor, Dili, Kuarta (25/06/2025).
Nia esplika, iha momentu nee INFPM hasoru situasaun neebe difisil, nunee INFPM foti desizaun hodi kompras aimoruk ho karakter emerjensia, tanba relasiona ho Amu Domingos Maubere Matebian nia kondisaun neebe mak kritiku no presiza tebes item sira nee.
“Hau hakarak atu dehan deit katak, iha momentu neeba hasoru siatuasaun neebe mak difisil, situasaun stock out iha item haat (4), presiza tebes atende ba pasiente iha HNGV ligadu ho ita nia Amu Domingos Maubere, iha momentu neeba baixa iha neeba presiza tebes item hirak nee, ita nia stk iha nee stock out entaun hakarak ka lakohi INFPM toma nia inisiativa hodi halo kompras emerjensia,” nia informa.
Nia deklara, iha momentu neeba INFPM kontaktu duni fornesedor ida Salimagu Unipesoal LDA, neebe submete presu mai laos US$ 79, maibe US$ 0,79 sentavus depois husi kustu unidade ida nee parte ami nia pesoal tekniku sira submete ba iha dokumentus kontratu neebe momentu neeba projetu nee estabelese kontratu entre INFPM no kompanhia Salimagu, “iha neeba ita nia pesoál tekniku lais tau US$ 0,79 sentavus maibe tau fali presu unidade US$ 79,” nia deklara.
Nia haktuir tan, bainhira INFPM deskobre ba erru presu unitariu nee iha momentu ekipa RNAE sira atu prepara depois kopia kontratu atu hein bainhira sasan tama atu halo ona verifikasaun ba inspensaun ba resivomentu sasan hirak nee.
“Entaun iha momentu neeba ekipa RNAE INFPM identifika kedas presu neebe la normal ba item Magnesium Sulphate Powered 49% (30gr) Garam Inggris ida nee nia presu laos 0,79 sentavus maibe US$ 79, entaun sira informa imediata mai kedan iha parte Diresaun kompras INFPM nia, parte Diresaun INFPM mos toma kedas inisiativa hodi halo revizaun ba kontratu neebe ami nia Diretóra Ezekutiva reprezentante INFPM ho kompaña Salimagu neebe estabelese kontratu,” katak nia.
Nia koalia, sasan sira nee kompanhia Salimagu seidauk kompras tanba parte Diresaun kompras INFPM sei halo revizaun ba nia presu sira nee.
“Dokumentu kontratu neebe hetan revizaun nee parte INFPM no Salimagu seidauk estabelese kontratu. No ida nee laos ita kompras deit ba Amu Domingos matebian ona nee, maibe kompras ba ita nia pasiente sira seluk neebe presiza reseita tuir mediku sira,” nia afirma.
Entretantu tuir planu atu sosa aimoruk nee hamutuk item haat (4) mak hanesan, item Alteplase 50mg 50, strength 50mg, unit inj, Quantity 50, unit price US$ 1.470,00 ho total price US$ 73.500,00 no manufacture Boehringer Ingelhem, item Methylprednisolone phosphate 125mg/ml vial, strength 125mg/ml, unit Ampul, Quantity 700, unit price US$ 3,80 ho totál price US$ 3.800,00 no manufacture Lapi, Mahakam, Phapros,Berno, Quantum, mbf.
Nomos iha Item TPN (Total Parenteral Nutrition), strength 1000kcal/1448ml, unit sofbag, Quantity 25, Unit price US$ 109,40, total price US$ 1.094,00 no manufacture Kalbe, Smof Kabiven no item Magnesium Sulphate Powered 49% (30gr) garam inggris, strength 49%, unit pcs, Quantity 60 Unit price US$ 0,79 totál price US$ 790,00 no manufacture PT Usfi. Ho nia total orsamentu neebe mak prepara atu hola aimoruk hamutuk rihun US$ 5 resin.
(jen)
