Dezenhu ba Supremu Tribunal Justisa Sei Lao Hela

DILI, STLTIMORLESTE.com – Kontituisaun fo dalan atu estabelese Supremu Tribunal Justisa (STJ), tanba nee oras nee daudaun dezenhu ba iha STJ lao hela.

Tuir Prezidente Tribunal Rekursu, Afonso Carmona katak atu harii STJ, tanba ida nee planu neebe nia promete ona iha simu tomada da pose, tanba nee dezenhu ba iha STJ lao hela.

“Dezenhu ba Supremu Tribunal sei lao hela, maibe dezenhu ida tuan nee la uza tanba iha mudansa ba dezenhu,” dehan PTR ba hornalista sira iha Kaikoli, Kuarta (25/06/2025).

Nia hatutan, atu harii STJ sei konvoka seminariu ida hodi envolve husi publiku sira atu fo hanoin hakarak harii STJ ka lae, maibe liu husi seminariu nee mak foin bele termina.

Sublina, nesesidade nesesita populasaun presiza ka lae tanba konstituisaun hateten atu harii STJ, no Tribunal Rekursu lao hodi hein bainhira mak estabelese STJ, no lei foun neebe mai mos husu atu harii STJ, tanba nee presiza estabelese atu bele funsiona servisu neebe iha.

Hatan kona-ba atu harii Tribunal iha Munisipiu, PTR dehan planu neebe iha sei harii tan Tribunal Primeira Instansia iha Ermera, Vikeke, Maliana no Baukau, maibe Baukau iha ona oinsa mak atu hadia fali.

Reforsa, kona-ba munisipiu tolu nee planu prioridade sei estabelese uluk iha Munisípiu Ermera no Maliana, tanba nee tempu badak PTR sei ba vizita iha Ermera no Maliana hodi haree kona-ba nia konstrusaun lao oinsa.

Akresenta, importante duni estabelse tribunal iha munisipiu sira, atu lori justisa hakbesik liu ba iha komunidade sira.

Iha fatin ketak, Jurista Alexandre Corte Real dehan, tempu too ona atu harii STJ, hodi haree kona-ba prosesu sira neebe lei fo dalan.

“Hau hanoin ita ukun aan kleur ona, tanba nee presiza duni atu estabelese SJT hodi haree ba prosesu sira neebe iha,” dehan nia.

Hatutan tan, ohin loron rekursu umanu iha setor justisa barak, balu neebe iha kapasidade diak no merese bele nomeia hodi ba tur iha STJ.

(ter)