DILI, STLTIMORLESTE.com – Ministeriu Publiku (MP) iha alegasaun ba krimi Burla Agravadu, solisita ba iha Tribunal Koletivu atu deside tuir konviksaun Tribunal nian.
Iha sala julgamentu laran loron Kuarta nee, Juiza Ersilia de Jesus deklara katak, prosesu refere Tribunal rona ona arguidu, maibe Tribunal seidauk rona lezadu tanba notifika lezadu dala rua ona maibe sertidaun negativa. Ho nunee mak Juiza prosesu deside hodi tama ba iha alegasaun.
Iha alegasaun nee Prokuradora Bemvinda do Rozario deklara katak, kazu nee primeiru lezadu mak ba hatoo keixa iha Ministeriu Publiku, no iha faktus hatudu katak arguidu mak sosa kareta nee, tanba arguidu nia naran rejista iha DNTT.
No provadu arguidu haree lezadu nia kareta no ikus mai arguidu mak sosa lezadu nia kareta, maibe lezadu ba husu fali osan restu arguidu hatudu fali ba sasin ALHC.
Prokuradora deklara, lezadu mos la mai iha Tribunal hodi deklara lo-loos, atu Tribunal bele haree se mak bosok ba iha prosesu nee, arguidu ka sasin. Maibe lezadu la marka prezensa, tanba nee Prokuradora sei duvida ho faktus nee, solisita ba iha Tribunal Koletivu atu deside tuir deklarasaun sira neebe iha.
Aleinde nee Advogadu husi arguidu nian Rui hateten katak, kona-ba prosesu ida nee arguidu la iha konhesimentu, no lezadu neebe hatoo keixa mos la mai iha Tribunal hodi defende saida mak lezadu hatoo iha perante Ministeriu Publiku. Tanba nee defeza husu ba iha Tribunal atu absolve arguidu husi faktus nee.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak, iha tinan 2021, oras la apurado, lezadu FRA sosa kareta ida marka Forenger, kor Silver iha Australia ho folin osan dolar Australia 21.000,00 (rihun rua nulu resin ida).
Iha loron 5 fulan Agusto 2021, lezadu tula kareta nee ho roo mai iha Timor Leste, nunee iha loron 8 fulan Agusto 2021, wainhira kareta nee hatun husi roo, arguidu ABAB haree hetan tiha, hodi koalia ba lezadu katak, nia hakarak sosa fali lezadu nian kareta nee.
Rona ida nee lezadu mos aseita hodi faan ho folin US$ 23.000,00.
Tanba aseita malu, arguidu fo uluk osan US$ 14.800,00 no sei falta US$ 8.450,00.
Nunee iha loron 26 fulan Julhu 2022, lezadu kontaktu ba arguidu hodi husu osan restu, maibe arguidu hatan katak hodi dun ba senhor ALHC mak sosa, nunee osan restu seidauk fo, agora daudaun sei iha Inglatera no seidauk fo informasaun kona-ba osan restu nee.
Maibe ikus mai deskobre katak kareta nee rejistu ona iha DNTT ho naran ABAB.
Konsekuensia husi arguidu nia hahalok nee fo prejuizu konsideravel ba lezadu, tanba lezadu nia osan restu husi kareta nian seidauk selu ate agora.
Arguidu ABAB komete krimi nee ho livre, deliberada no konsientemente, hatene katak kareta nee laos pertensia ba nia, maibe nia hakarak apropria ho meios engano no kontra lei.
Tanba nee konstitui arguidu ABAB nuudar autoria material ba krimi Burla Agravada neebe previstu no punidu iha artigu 267 husi Kodigu Penal.
Prosesu nee prezide husi Juiz Koletivu, Ersilia de Jesus, Ana Paula no Jose Maria, Ministeriu Publiku reprezenta husi Prokuradora Bemvinda do Rojario, arguidu hetan asistensia legal husi Advogadu Privadu Rui.
(ter)
