DILI, STLTIMORLESTE.com – Tribunal Judisial Primeira Instansia Dili liu husi leitura akordaun deside absolve arguidu ho inisial ADJ, tanba konsidera la provadu ba iha krimi neebe Ministeriu Publiku akuza kona-ba Pekulatu de Uzu no Administrasaun Danoza.
Iha sala julgamentu laran Juiz prosesu Zulmira Auxiladora deklara katak, iha akuzasaun Ministeriu Publiku nian dehan arguidu halo kobransa ilegal, maibe iha sala julgamentu laran Tribunal konfirma ba iha arguidu no arguidu deklara katak, momentu neeba inisiativa husi negosiante sira mak atu rekolha osan hodi hadia haris fatin sira neebe aat, no negosiante sira mak nomeia arguidu hodi zere osan nee.
Tribunal mos bazeia ba arguidu nia deklarasaun katak, osan neebe rekolha hadia duni haris fatin sira neebe aat, hodi negosiante sira bele uza.
Juiza prosesu deklara, Tribunal mos rona ona sasin ida hanesan negosiante no sasin nee mos deklara, inisiativa hodi halo kobransa nee laos mai husi arguidu, maibe mai husi negosiante sira.
Tribunal mos konsidera katak, Ministeriu Publiku mai deit ho akuzasaun katak arguidu halo krimi Pekulatu de Uzu no Administrasaun Danoza halo kobransa no utiliza osan neebe iha hodi benefisia ba nia aan rasik, maibe MP la iha provas ba utilizasaun neebe arguidu halo.
Haree ba deklarasaun husi arguidu, reforsa tan ho sasin sira, Tribunal Koletivu haree katak la provadu arguidu komete krimi neebe Ministeriu Públiku akuza mai iha Tribunal. Ho nunee Tribunal deside hodi absolve arguidu.
Tribunal mos husu atu Prokurador la aseita bele halo rekursu tuir prazu loron 30 sura husi loron neebe simu notifikasaun ba desizaun.
Antes nee iha alegasaun, Prokurador João Marques husu ba iha Tribunal atu kondena arguidu pena prizaun tinan 3 suspende ba tinan 3.
Enkuantu defeza arguidu nian Eustaqio Guterres haree katak la iha negosiante ida mak sai vitima ba aktu neebe arguidu halo, tanba arguidu ho negosiante sira iha konkordansia mak halo kobransa, hodi hadia haris fatin neebe aat atu sira utliza, no mos osan nee halo manutensaun ba sasan merkadu nian neebe avaria.
Tanba nee Defeza konsidera la provadu ba iha krimi nee no husu Tribunal atu absolve arguidu.
Prosesu antes nee Tribunal mos rona ona deklarasaun husi negosiante sira, ekipa autoridade husi Ministeriu Administrasaun Estatal, eis Prezidente Autoridade Munisipiu Dili, no mos eis Xefi Departamentu Gestaun Merkadu Munisipiu Dili.
Antes nee mos arguidu deklara katak, kobransa neebe iha konkordansia entre ekipa jestaun merkadu ho negosiante sira, atu utiliza ba halo manutensaun ba haris fatin, hadia AC, supa sentina, sosa bee, sosa nasi bunkus ba atividade sira iha merkadu.
No utlizasaun ba orsamentu sira nee sempre hatoo relatoriu ba xefe Jestaun Merkadu Munisipiu Dili.
Prosesu nee prezide husi Juiz Koletivu, Zulmira Auxiladora, Ivan Patroceni no Arjentino Nunes, Ministeriu Publiku reprezenta husi João Marques, arguidu hetan asistensia legal husu Defensor Publiku, Eustaquio Guterres.
(ter)
