DILI, STLTIMORLESTE.com – Prezidensia Republika (PR) realiza workshop kona-ba Programa Promosaun Turizmu Timor Leste (PPTTL), hodi halo avaliasaun hamutuk iha Palasiu Prezidensial.
Iha biban nee Visi Primeiru Ministru, Ministru Koordenador Asuntus Ekonomiku no Ministru Turizmu no Ambiente, Francisco Kalbuady Lay liu husi nia diskursu iha Palasiu Prezidensial Nikolao Lobato, Bairo Pite, Kinta nee (26/06/2025) hatoo agradese ba komitmentu husi Prezidente Republika Jose Ramos Horta neebe iha inisiativa hodi realiza workshop kona-ba PPTTL iha Palasiu Prezidensial.
Visi PM dehan, ondra boot ida hanesan Visi Primeiru Ministru Assuntu Ekonomiku nia bele mai iha Palasiu Prezidensial, lori Governu nia naran primeiru apresia no agradese ba Prezidente Republika neebe mak autoriza, aumezmu tempu sai hanesan mentor ida hodi realiza workhop nee. Antes realiza workhop ida nee iha ema lubuk ida mak durante nee fo sira nia kontribuisaun, tanba nee hatoo agradese ba parte hotu nia kolaborasaun.
“Ohin ita laos deit halo avaliasaun ninia, maibe halibur hamutuk tau aspirasaun sira neebe fahe ba futuru atividade turizmu nia iha Timor Leste, ita boot sira nia enerjia ho dedikasaun reafirma ona katak ita halao iha dalan neebe mak los ba setor turizmu ho setor sira seluk neebe mak inkluzivu rejilente, konsiente ba iha ambiente,” dehan Visi PM Kalbuady Lay.
Iha biban nee Visi PM hatete, orgulhu hamutuk ho ekipa neebe servisu hamutuk iha identidade nuudar nasaun ida.
No diskusaun ida ohin nia destaka ona planu importante oportunidade sira neebe mak responsabilidade neebe mai ho promosaun no jestaun turizmu nia husi ezemplu notavel esperensia iha buat oin-oin hahu husi festival Rabilau neebe tinan kotuk halo furak tebes.
Enkuadramentu legal sira no partisipasaun komunidade ninia ita hotu hatene katak Timor Leste iha fundasaun forte ida atu hadia ekonomia turizmu azul no verde ida neebe mak buras, rai ida neebe mak buras ho grasa Nain Maromak nia bele fo rai ida furak tebes, foho aas, tasi ho konbinasaun neebe furak tebes.
“Hau apresia ba esperitu kolaborativu neebe mak ita kria diskusaun kona-ba padraun prosedimentu operasional sira asegura kualidade ho seguransa, katak fo protesaun ba ita nia patrimoniu kultural ho natural ita boot sira kontribui ona ideia sira neebe mak sei kontribui direitamente iha ita nia politika neebe susesu,” katak nia.
Nunee mos Visi Primeiru Ministru hanesan mos Prezidente Komisaun Organizadora, Mariano Asanami Sabino hatete, hamutuk fo agradese ba Prezidente Republika ho inisiativa no hanoin neebe diak tebes halibur hotu-hotu realiza workshop ida nee.
“Primeiru hatoo agradese ba Prezidente Republika ho nia inisiativa no hanoin neebe diak tebes bele halibur ita hotu, hau nuudar Prezidente hamutuk ita halao atividade ida neebe importante tebes, agradese mos ba Visi Primeiru Ministru nuudar konseleiru ba atividade ida nee ba membru Governu sira PNTL no F-FTL hotu-hotu neebe esforsu durante nee,” katak nia.
Prezidente Komisaun Organizadora dehan, atividade nee iha komponente tolu apresia ba lideransa komponente tolu nee, ida husi ensinu superior atu bele kontinua nafatin ba oin, ba seminariu internasional neebe mak durante nee halo tiha ona, se bele kontinua nafatin, no ba joventude no desportu nee atividade konkreta ida neebe tinan tinan sempre halo atu bele mantein nafatin, no atividade ida fali mak iha promosaun turizmu.
Ba oin kontinua nafatin atividade ida nee, no liu husi workshop ida nee importante tebes para oinsa mak bele fo kontinuidade ba oin, lisaun lubuk ida mak aprende, no lisaun premeiru mak husi ekipa barak liu-liu husi Xefe Kaza Sivil ho adjunta bele halo koordenasaun ida diak entre interministerial liga ho atividade ida nee.
“Lisaun ida ita aprende mak ho ita nia fiar ba malu ho ita nia servisu hamutuk ho ita nia konektividade servisu bele lao ho diak, lisaun segundu ita mos apresia ba Xefe Kaza Sivil ho nia adjunta ho Tomi Blar institutu bela halo avalisaun ida diak, avaliasaun institusional, avaliasaun kontiudu programa ho avalisaun ida para oinsa futuru mai halo diak liu tan,” katak Visi PM.
Iha biban nee hanesan Prezidente Komisaun Organizadora hatoo apresia ba parte hotu neebe ho esforsu no hakaas aan halo servisu neebe diak, tanba nee nafatin hamutuk halo avaliasaun ho diak, tanba avalisaun ida nee lisaun barak laos deit programa ida nee deit mais lisaun bele foti hodi haree programa seluk neebe bele halo hamutuk.
Tuir observasaun neebe STL hetan, workshop kona-ba PPTTL hodi halo avaliasaun hamutuk nee hetan partisipasaun husi Xefe Kaza Sivil Prezidensial Republika ho ekipa, Visi Primeiru Ministru nain rua, Membru Governu, Komandante PNTL, autoridade lokal no partisipante seluk tan.
(eme)
