BAUKAU, STLTIMORLESTE.com – Komunidade Aldeia rua (2) iha Suku Sagadate, Postu Administrativu Laga, Munisipiu Baukau, durante nee konsumu deit bee mota.
Xefe Suku Sagadate, Aureliano de Jesus esplika, Suku Sagadate iha Aldeia 11, Aldeia sia (9) asesu ona bee moos husi kanalizasaun Programa Nasionál Dezenvolvimentu Suku (PNDS), enkuantu aldeia rua (2) seluk hanesan Aldeia Siribu no Abuti seidauk hetan bee moos.
“Aldeia rua nee uma kain 140 resin mak seidauk asesu bee moos, tempu udan nee kuru bee iha mota,” hateten Aureliano ba jornalista STL iha Vila Antiga, Baukau, Kinta (26/06/2025).
Nia sublina, komunidade husi uma kain refere obrigatoriu lao ain ho distansia kilometru ida ho balun hafoin too iha mota hodi kuru no lori fila ba uma hodi utiliza ba tein no seluk tan.
Tuir Aureliano katak, konsumu bee mota fo impaktu ba saude, tanba kontaminadu husi foer barak neebe mota lori.
Nia fundamenta, hanesan Autoridade Suku relata ona preokupasaun refere ba Diresaun Servisu Munisipal Agua Saneamentu no Ambiente (SM-ASeA) Baukau, atu haree asuntu refere, maibe seidauk iha solusaun.
“Ami husu ba parte relevante sira, se bele karik funsionariu sira iha munisipiu nee halo identifikasaun direita iha terenu para hatene situasaun,” Aureliano Sujere.
Hatan ba kestaun nee, Diretora SM-ASeA Baukau, Norberta da Costa hateten, preokupasaun refere Autoridade Suku seidauk relata proposta ruma, maibe hanesan dirijente SM-ASeA husu nafatin Autoridade Suku refere halo identifikasaun ba bee matan sira neebe besik hodi ajusta iha reuniaun Asembleia Postu Administrativu hafoin deside.
“Atu akresenta tan katak, koalia kona-ba nivel planeamentu mai husi baze, ba SM-ASeA atu dehan katak, bainhira Autoridade Suku identifika ona nesesidade prioridade, maibe ida nee mos ita sei haree kategoria ba Orsamentu PDIM indika ona mak SM-ASeA halo servisu halo planu estabelese grupu maneza fasilidade,” hateten Norberta.
Diretora nee katak, atu solusiona preokupasaun refere sei haree ba orsamentu, tanba servisu SM-ASeA foku deit ba halo planu estabelese grupu maneza fasilidade sira bainhira iha ona kanalizasaun bee moos ba komunidade aldeia rua refere.
Entretantu Suku Sagadate nia aldeia mak hanesan Alasafa, Lasula, Beliuali, Siribu, Abuti, Auraba, Na’afa, Samagata, Selegua, Odebu’u no Ulabuti neebe rejistu populasaun hamutuk 3,870 resin husi Xefe familia 975.
(tom)
