DILI, STLTIMORLESTE.com – Komando Polisia Nasional Timor Leste (PNTL) realiza enkontru hamutuk ho ministeriál hanesan Ministeriu Obras Públiku (MOP), Terras no Propriédade inklui mos Xefe Suku sira atu koalia kona-ba prosesu konstrusaun Kuartel Jerál PNTL.
Nia dehan, enkontru kona-ba teknikus levantamentu uma ba afeitadu sira ba Kuartel Jerál PNTL no rai ba uma kain haat (4) nomos koalia kona-ba prosesu konstrusaun Kuartel Jerál PNTL iha pontu rua ida nee.
“Ita hotu akompanha iha prosesu ba iha konstrusaun Kuartel Jerál PNTL, prosesu ida neebe naruk tebes-tebes, tanba iha mos problema balun neebe ita seidauk rezolve too agora,” hatete Segundu Komandante Jeral Polisia Nasional Timor Leste (PNTL), Komisáriu Jerál Polisia Pedro Belo liu husi nia diskursu iha Komando Jeral PNTL Kaikoli, Dili, Kinta nee (26/06/2025).
Nia esplika, hotu-hotu hatene katak, konstrusaun ba edifisu Kuartel Jerál PNTL nomos ba iha Komando Munisípiu sira, iha mos ba Eskuadra sira nomos bairu polisia sira ida importante tebes, tanba nee tama ona ba planu estratejiku iha PNTL nian neebe hotu-hotu akompanha.
“Ohin loron ita hamutuk para iha ona solusaun ida neebe diak, para ita halao ona ita nia konstrusaun, tanba ita hatene katak iha ona orsamentu atu halao ona, maibe ita iha problema oituan ba afetadu kona-ba uma kain haat iha problema kona-ba rai” nia deklara.
Nia relata, konstrusaun PNTL fatin ida nee la sufisiente ona ba servisu atividade operasaun PNTL, tanba servisu neebe aumenta ba beibeik, tanba nee persiza kondisaun neebe diak atu nunee polisia halao servisu.
“Ita boot sira mos bele hatene katak, ita nia governu oras nee daudaun servisu makaas, oinsa Timor Leste atu tama ba ASEAN iha fulan Outubru mai, entaun dignidade ba nasaun nian ita persiza edifisiu Kuartel Jerál PNTL ida neebe mak di’ak,”katak nia.
Iha fatin hanesan, Domingos de Jesus Sequiera hanesan Diretór Jeral MOP-DGHU esplika, enkotru ida nee husi inisiu problema ida nee kleur liu ona nunka iha finalidade, tanba konstrusaun Kuartel Jerál PNTL nee kleur ona iha planu maibe seidauk halao tanba probelma oin-oin neebe akontese iha neeba.
“Ita koalia kona-ba Kuartel Jerál PNTL ninia prosesu kleur, responsabilidede ba konstrusaun projetu nee MI no utulizador PNTL, husi kondisaun nee ida nee ninia prosesu lao ate 2016 too 2017 kuandu implementa ita hasoru ona problema, problema iha fundasi kontrusaun nee rasik,”nia deklara.
Nia informa, fo kontribuisaun tomak, tanba nee oinsa harii uma ida dignu ba PNTL, maibe iha falhansu iha manajementu, ida nee mak akontese too agora, tanba sistema jere manajementu.
“Tanba nee iha enkotru ida nee ita fo hanoin ba malu, atu bele realiza Konstrusaun Kuartel Jerál PNTL nian, atu nunee ita nia polisia servisu diak liu tan ba ita nia povu no nasaun ida nee,” nia informa.
Nunee mos Xefe Suku Kaikoli, Hipolito Marques Sarmento infoma, enkotru nee ikus ba ida nee atu foti levantamentu dadus foun iha Tersa agora, atu nunee bele halo konstrusaun Kuartel Jerál PNTL nian.
“Iha uma kain haat mak nain ba rai, maibe komunidade sira seluk nee ita tenke tun fali ba para haree didiak, tanba uluk ita hatur fatuk dahuluk nee komunidade sira seidauk halo uma diak, tanba nee fo tempu mai hau, hau tun hodi tur hamutuk ho sira, depois hau fo fali informasaun ba advogadu, tanba aban ita tun nee labele,” nia afrima.
(jen)
