DILI, STLTIMORLESTE.com – Prezidensia Republika (PR) hamutuk ho IX Governu Konstitusional aprezenta relatoriu ba Avaliasaun Programa Promosaun Turizmu Timor Leste (TL), iha Palasiu Prezidensia.
Iha loron Kinta nee (26/05/2025) Prezidensia Republika Demokratika Timor Leste no IX Governu Konstitusional organiza sorumtu hodi aprezenta relatoriu avaliasaun komprehensivu husi Programa Promosaun Turizmu Timor Leste (PPTTL) 2024, hodi reforsa kompromisu nasaun nian ba dezenvolvimentu turizmu sustentavel liu husi planeamentu bazeia ba evidensia no governasaun inkluziva.
Sorumutu nee halao iha Salaun Xina, Palasiu Prezidensial Nicolau Lobato, halibur ofisial superior governu nian, stakeholder turizmu, no hodi halo revizaun ba realizasaun xave sira, avalia impaktu ekonomiku, no define diresaun estratejiku ba setor turizmu Timor Leste nian.
Iha biban nee Visi Primeiru Ministru no Ministru Turizmu no Ambiente, Francisco Kalbuadi Lay iha nia diskursu abertura kona-ba Promosaun Turizmu iha Timor Leste no ofisialmente inaugura sorumutu nee.
Iha nia diskursu, Visi Primeiru Ministru Lay sublina dedikasaun governu nian atu pozisiona turizmu nuudar fundasaun ba dezenvolvimentu ekonomiku sustentavel.
Visi Primeiru Ministru no Ministru Dezenvolvimentu Rural, Mariano Assanami Sabino, nuudar Prezidente Komisaun PPTTL 2024, hatoo agradesimentu ba implementasaun susesu no serimonialmente simu Relatoriu Avaliasaun PPTTL 2024, marka pasu signifikativu ida iha viajen dezenvolvimentu turizmu nasaun nian.
Nunee mos Institutu Tony Blair aprezenta vizaun jeral ida neebe detallu kona-ba relatoriu avaliasaun nian, destaka susesu operasional, identifika dezafiu implementasaun, no fornese rekomendasaun estratejiku ba inisiativa turizmu iha futuru.
Apresentasaun nee sublina programa nia impaktu ekonomiku sira neebe bele sukat no trasa dalan hodi hasae kreximentu setor nian.
Sorumutu nee aprezenta sesaun diskusaun aberta dinamiku iha neebe stakeholder sira envolve iha dialogu signifikativu kona-ba rezultadu importante no esplora oportunidade ba kolaborasaun neebe espandi.
Aprosimasaun inkluziva ida nee demonstra governu nia kompromisu ba governasaun transparente no envolvimentu komunidade iha dezenvolvimentu turizmu.
Eventu nee ezemplifika parseria susesu entre Prezidensia Republika no Governu Konstitusional IX, iha lideransa Prezidente Republika José Ramos Horta. Sinerjia institusional ida-nee sai instrumental hodi lori progresu signifikativu iha setor turizmu Timor Leste nian liuhusi implementasaun polítika neebe koordenadu no envolvimentu stakeholder sira.
Iha ninia diskursu enserramentu, Visi Primeiru Ministru, Kalbuadi Lay reafirma Timor Leste nia dedikasaun atu avansa turizmu nuudar pilar dezenvolvimentu sustentavel, hodi sublina governu nia kompromisu atu harii liu husi lisaun sira neebe aprende husi PPTTL 2024 hodi hasae estratejia promosaun turizmu iha futuru.
Sorumutu nee remata ho rekomendasaun teknika husi Institutu Tony Blair, hodi rezumu pontu asaun xave sira neebe sei orienta implementasaun inisiativa estratejiku sira turizmu nian ba oin.
Sorumutu avaliasaun ida nee reprezenta pasu signifikativu ida iha Timor-Leste nia esforsu sira neebe lao hela atu dezenvolve industria turizmu ida neebe forte no sustentavel neebe fo benefísiu ba komunidade lokal sira enkuantu hatudu nasaun nia patrimoniu kultural riku no beleza natural ba mundu.
(eme)
