DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interogatoriu, deside hodi aplika medida Aprezentasaun Periodika (AP) ba arguidu nain 5 neebe deskonfia naok telefone.
Iha despaisu nee, Juiza Prosesu Fransisca Cabral deside, aplika medida Aprezentasaun Periodika ba arguidu nain 5 atu aprezenta aan iha Eskudra Polisia neebe hela besik ba, hahu husi loron Segunda too iha loron Domingu.
Tuir Advogadu Privadu, Agustinho de Jesus katak, kazu nee defensor mak kaer, maibe arguidu ida mak fo prokurasaun ba Advogadu, tanba nee mak iha despaisu nee Defensor sira la marka prezensa, Advogadu mak rona hotu despaisu.
“Arguidu nain 5 mak Tribunal aplika medida Aprezentasaun Periodika ba sira, no Ministeriu Publiku promove sira mai Tribunal ho krimi Furtu,” dehan Advogadu nee ba jornalista STL iha Kaikoli, Kinta (26/06/2025).
Nia hatutan, parte ida neebe diak mak Tribunal komunika kedan arguidu sira nia inan aman ba para hodi bele fo hanoin atu eduka no hanorin sira nia oan.
Prosesu nee prezide husi Juiz Turnu Fransica Cabral, Ministeriu Publiku reprezenta husi Prokurador Antonio Tavares, arguidu sira hetan asistensia legal husi Defensor Publiku, Eustaquio Guterres, Manuel Exposto no Advogadu Agustinho De Jesus.
Tuir observasaun STL nian, arguidu nain 7 mak autoridade seguransa lori ba iha Tribunal, maibe arguidu nain 2 ho idade minoridade, tanba nee labele partisipa ba iha prosesu primeiru interogatoriu nee.
Arguidu sira lori ba iha Tribunal Dili iha loron Kuarta hodi halo identifikasaun, no iha loron Kinta nee mak Tribunal liu husi Juiz turnu foin hasai despaisu ba iha prosesu nee.
(ter)
