DILI, STLTIMORLESTE.com – Uni Emirat Arab (UEA) liu husi Governu Autoridade Abu Dhabi sei apoiu halo dormitoriu iha Palasiu Prezidensial nia sorin hodi akumula inan feton sira.
Antes nee Prezidente Republika halo koordenasaun ho madre sira Canosiana Balide atu halo konstrusaun iha madre sira Balide, nunee inan feton sira neebe mak aban bainrua hela iha dormitiriu nee madre sira mak tau matan, maibe hein resposta husi madre superior husi Italia Roma kleur, tanba nee Prezidente foti desizaun muda fali iha Palasiu Prezidensial sorin.
Oinsa nia progresu harii dormitoriu iha Palasiu Prezidensial, hatan ba kestaun nee Prezidente Republika Jose Ramos Horta hatete, progresu nee Prezidente sei hetan lai update ruma husi office mak fo hatene.
“Hau sei hetan lai update ruma husi office, hau nia office, portantu rai atu halo dormitoriu nee laos ona iha Balide, lo-loos halo dormitoriu iha Balide mak entrega ba Madre Canociana, madre Timor oan kontente ho projetu nee maibe hein fali ama madre sira husi Roma para autoriza, maibe hein laiha resposta ruma entaun hau komunika ba madre sira Balide hau halo desizaun projetu Abu Dhabi apoiu halo dormitoriu nee muda ba Palasiu Prezidensial Nikolao Lobato nia sorin,” hatete Prezidente Republika, Jose Ramos Horta ba jornalista sira iha Aeroportu Internasional Nikolao Lobato, Komoro, Kinta lokraik (26/06/2025).
Prezidente Republika hatete, fatin neebe halo dormitoriu iha Palasiu Prezidensial nia sorin nee diak tebes no sentral.
“Ema familia 60 mak okupa rai nee no prezidensia halo dialogu ho sira hotu simu ho diak prontu atu sai, ami koalia tiha ho Ministeriu Obras Publika, orsamentu iha para selu sira, konforme sira nia pedidu idak-idak, sira hatete ami hakarak presiza ida nee entaun kinentus ital mil dolares depois hein deit rekolha sira nia konta bankaria para transfere osan deit ba sira nia konta,” katak Horta.
Bainhira transfere ona osan ba komunidade uma kain 60 neebe mak okupa rai Prezidensial Republika nia kotuk, mak Obras Publika no prezidensia koordena sei ajuda sira sai husi fatin neeba, foti sasan sai husi fatin refere nunee dormitoriu sei halo iha neeba.
“Tanba muda ba iha nee arkitetu husi Abu Dhabi sei haree hamutuk ho enjeñeiru sira neebe Governu Abu Dhabi kontrata tenke haree para muda fali oituan dezain nee, tanba dezain edifisiu ida tuir rai neebe ita iha, tanba husi Balide muda fali ba fatin neebe tetuk klaru fasil liu no mamuk, hau espera tinan ida nee duni sei hahu, tanba liurai boot Abu Dhabi nia hatete ba nia ministru sira hakarak haree edifisiu nee prontu masimu 18 mezes tenke prontu,” hakotu PR.
(eme)
