DILI, STLTIMORLESTE.com – Tribunal Rekursu (TR) hasai ona desizaun hodi husu Tribunal Primeira Instansia halo re-julgamentu foun ba kazu Zizelma Maria Fatima Verdial Gonsalves, tanba nee matebian nia aman hatoo agradese.
“Hau fo obrigadu barak ba Tribunal, tanba hau nia oan feto la toba nia fo mehi beibeik, nia fo hanoin ba hau katak, nia presiza justisa, nia dehan pae hau hakarak justisa,” dehan Jaime do Rego Gonsalves, ba jornalista sira iha Kaikoli, Sesta (27/06/2025).
Nia hatutan, nuudar aman ida tenta sai leet tama leet buka hatene oinsa Justisa iha ita nia rain, iha duni ka lae.
“Iha lorin Kinta horiseik (26/06) Tribunal Rekursu fanu nia, hodi informa katak Zizelma nia kazu desizaun sai ona, tanba nee mak hasoru asistente hodi esplika.
Nia dehan, la iha hanoin atu baku malu, maibe mai iha Tribunal presiza deit mak justisa, tanba uluk luta hakarak justisa.
Tuir observasaun STL nian, matebian nia aman koalia ba media ho mata-been, no liafuan neebe husu mak buka justisa.
Prosesu refere koletivu husi Tribunal Rekursu deside mak hanesan Juiza Jacinta Correa, Juiz Deolindo dos Santos, Juiz Duarte Tilman Soares.
Koletivu nee deside nulu ba desizaun neebe Tribunal Judisial Primeira Instansia foti ona antes nee, husu atu ordena fali ba iha julgamentu foun hodi haree faktus foun sira, hodi deside fali desizaun foun.
(ter)
