DILI, STLTIMORLESTE.com – Komunidade Aldeia rua (2) hanesan Aldeia Baiafa no Aldeia Baboru, iha suku Wacala, Postu Administrativu Baguia, Munisipiu Baukau, dezde ukun aan too ohin loron seidauk asesu ba iha linha eletrisidade iha tempu kalan.
Kestaun nee hatoo husi Xefe Suku Wacala, David Manuel Freitas ba jornalista STL liu husi telefone iha Lavateri, Sesta nee (27/06/2025).
Mezmu nunee, maske Timor ukun aan tinan 20 resin ona, maibe iha Suku Wacala iha populasaun barak mak too agora kontinua halerik nafatin ba ahi eletrisidade iha tempu kalan, tanba populasaun barak mak seidauk asesu ba eletrisidade.
Xefe Suku Wacala, David Manuel Freitas esplika, iha Suku Wacala kompostu husi Aldeia 4 mak hanesan Aldeia Baiafa, Aldeia Baboru, Aldeia Betumutu no Aldeia Wacala, entre aldeia 4 nee iha aldeia 2 hanesan Aldeia Baiafa no Aldeia Baboru mak too agora seidauk asesu ba eletrisidade.
“Komunidade iha Suku Wacala iha aldeia rua mak hanesan Aldeia Baiafa no Aldeia Baboru ho nia total populasaun hamutuk 111 neebe mak seidauk asesu ba eletrisidade, iha uma kain rua mak dook liu, entaun foin daudaun hetan ajuda husi Meiu Ambiente oferese solar painel ba sira hodi uza iha tempu kalan no komunidade hamutuk 195 mak asesu uluk ona ba eletrisidade,” dehan Xefe Suku David.
Nia argumenta, populasaun neebe iha estrada boot deit mak asesu ba eletrisidade, tuir besi riin neebe mak tidin tuir estrada publiku,.maibe iha populasaun balun uza rasik sira nia fiu hodi dada ahi ba uma hodi sente naroman iha tempu kalan.
“Populasaun sira neebe mak dook husi estrada boot mak ida ka rua uza rasik sira nia fiu hodi dada rasik eletrisidade ba uma tanba distansia neebe mak dook husi estrada boot, tamba aldeia balun dook husi suku,” nia tenik.
Nia dehan, aldeia 2 neebe mak seidauk asesu ba eletrisidade nee dook husi estrada boot no hela fali iha foho sorin, nunee tenke liu husi fali Postu Baguia ba Suku Larisula hafoin ba aldeia rua nee.
“Ba aldeia 2 nee lao haleu tiha mak foin too, neebe dala ruma ami liu husi fali Baguia depois ba Larisula mak foin ba aldeia rua nee, maibe iha planu sei hatoo ba iha parte relevante sira hodi bele responde ba asuntu ida nee.
Entretantu iha Suku Wacala total populasaun hamutuk 656, kompostu husi Aldeia 4 mak hanesan Aldeia Baiafa, Aldeia Baboru, Aldeia Betumutu no Aldeia Wacala.
(EST 1)
