DILI, STLTIMORLESTE.com – Hospital Nasionál Guido Valadares (HNGV) selebra aniversáriu ba dala 22, tanba nee husu ba Profisional Saude sira tenke servisu profisional no imprasialidade.
Nia dehan, HNGV instituisaun boot ida neebe sai referensia ba sistema saude publika iha Timor Leste (TL)
“Ita ohin komemora ho tema hatudu gratidaun no esperansa iha kuidadus ba pasiente, ho signifikativu favór humanista neebe persiza kontinua orienta ita nia servisu kompetensia no husu mos profisional saúde sira hotu servisu ho profisional no imprarsialidade,” hatete Ministra Saúde (MS), Elia dos Reis Amaral ba jornalista sira liu husi nia diskursu wanhira partisipa aniversáriu HNGV ba dala 22 iha HNGV, Sesta nee (27/06/2025).
Nia tenik, HNGV halo tinan ba dala 22, HNGV servisu hanesan esperasa ba familia hotu-hotu iha fatin ida nee, iha koridor ida nee, persiza tau hanoin kona-ba istoria moruk no istoria midar neebe hotu-hotu enfrenta.
Nia esplika, pasiente mai ho frakeza no esperasan, profisionál saúde hanesan doutor, infermeiru sira, ba sira neebe dudu oksigen, kliner sira, funsionariu sira hotu iha banco de sange, tenkniku sira nomos sira seluk tan, hasoru sira nia responsabilidade atu restaura moris fali.
“Ba profisionál saúde ne’ebé sakrifika aan hodi serve ita nia komunidade, ba familia sira neebe fo konfiansa ba sistema saude no ba instituisaun parseiru sira neebe kontinua apoiu, ohin ba oin ita sei halo diak liu tan, bele hadomi diak liu tan, bele fo atensaun di’ak liu tan ba pasiente no familia sira neebe akompanha pasiente mai iha HNGV,” nia deklara.
Nia koalia, ba profisional saude sira neebe iha tempu difisil inklui tempu krize ba pandemia Covid-19, Profesional Saude sira mos sai eroi iha tempu difisil no ate agora.
“Ita halo esforsu boot atu kontinua servisu ba povu, ita kompriende katak dezafiu sempre mai kada loron, ita hatene katak kondisaun trabalhu mak izije liu, maibe iha tempu ne’ebé difikuldade ba ita nia publiku sira atu amostra ita nia valor domin neebe ita halo atendimentu ba ita nia pasiente sira,” nia informa.
Iha fatin hanesan, Visi Primeiru Ministru, Ministru Cordenador dos Assuntos Soçiais, Mariano ASSANAMI Sabino dehan, HNGV selebra ninia aniversáriu ba dala 22, ida nee sai reflesaun ba Profesional Saude sira ohin atu fo atendimentu neebe diak liu tan ba pasiente sira ho diak.
“Ita halo reflekasaun no haree didiak oinsa ita nia Hospital Nasionál Guido Valadares nuudar hospital fundamentu primeiru iha kedas linha oin, ita iha hospital referal, Sentru Saude, postu saude nomos klinika sira, mak ita bele dehan esperasan ikus liu mak HNGV,” nia deklara.
Nia hatutan, hospital uniku neebe mak lidera hoslital hotu iha teritoriu laran mak HNGV, tanba nee mak loron ida nee hanesan reflesaun ida ba Profesional Saude sira bele dezenvolve diak liu tan HNGV.
“Loron ida nee hanesan loron reflesaun ida ba ita oinsa mak ita bele dezenvolve diak liu tan ita nia HNGV,” nia dehan.
Nia informa, dezenvolvementu liu ba saude iha hopsital sira nee depende liu ba profisional saude sira nia seriedade hodi servisu hamutuk liu-liu ba juramentu neebe sira halo tiha.
Nia esplika, IX Governu ninia rekonhesimentu ba imi hotu nia papel importante tebes para servisu ho diak ho atende pasiente sira neebe baixa iha HNGV.
Nia argumenta, Profisionál Saúde sira tenke kumpri servisu hodi salva pasiente sira, tanba Profisionál Saúde sira halo ona juramentu.
“Hau lakohi koalia barak ba imi, tanba imi juradu, para atu kumpri imi nian servisu ba imi juramentu, imi nia misaun importante mak salva ema, salva pasiente sira, entaun husu dala ida tan servisu hamutuk diak, idak-idak dezempenha ninia papel importante, liu-liu papel profisionál neebe mak importante,” katak nia.
Nia deklara, Profesional Saude sira tenke iha teknolojia para salva ema nia vida, ita tenke hatudu ita nia profisionál ba salva ema nia vida, georafikamente ita nasaun kiik, maibe politikamentu hanoin ida ba salva ema, hanoin para ba direitus humanus ita hanesan mos ho nasaun boot sira.
Nunee mos Diretor Ezekutivu Hospital Nacional Guido Valadares (HNGV), Nuno Vital Soares informa, HNGV iha ona planu hamutuk ho Ministeriu Saude atu halo mudansa total iha tinan 2026.
“Ita haree master plan neebe mak Ministériu Saúde prepara, neebe ami so adapta tuir deit, karik pasiente sira barak liu ita sei evakua ba Hospital Lahane, maibe ita sei atende ita nia pasiente ho pasiensia,” nia afirma.
(jen)
