BAUKAU, STLTIMORLESTE.com – Govenu liu husi Ministeriu Administrasaun Estatal ofisialmente inaugura ona Postu Administrativu Kelikai Antigu, neebe Administrador Postu Kelikai Antigu, Fransisco Matias Gusmão “Junior” deklara, Kelikai oan la fahe malu.
Reprezentante Ministru Administrasaun Estatal, atual Diretor Jeral Desentralizasaun Governu Lokal, António A. Guterres esplika, kulturalmente Postu Kelikai Antigu mai ho Suku Ualu, kompostu Suku Tekinomata husi Postu Administrativu Laga, Suku Samalari, Lavateri husi Postu Baguia, no Suku lima seluk hanesan Afasa, Namanei, Gurusa, Uaitame no Abafala iha tempu pasadu liu ba.
Kelikai Antigu reativa hikas iha Suku Ualu nia leten, tanba bazeia ba proposta husi Suku Afasa, Namanei, Gurusa, Uaitame no Abafala ho nia Aldeia 21 neebe inisiativa mai husi komunidade sira hakarak reativa hikas Postu Kelikai Antigu, nunee administrasaun besik liu ba povu.
Nunee iha tempu VIII Governu Konstitusional konsidera povu husi suku lima refere nia inisiativa hodi foti dezisaun reativa hikas postu refere no kontinua ba faze funsionamentu administrasaun implementa husi IX Governu Konstitusional neebe ho objetivu lori administrasaun besik ba povu.
“Hanesan Administrador hateten, ema ida la fahe Kelikai, tanba proposta Xefe Suku sira asina no Afasa nia oan ida naran konhesidu iha mundu mak ita nia Amu doben Dom Carlos Ximenes Belo, halo proposta akompanha ho dokumentus ho mos rekomendasaun, tanba nee mak Governu tenke rekonhese,” haktuir Antonio iha Kelikai Antigu hafoin inaugura edifisiu Postu Kelikai Antigu, Sesta (27/06/2025).
Diretor Jeral Dezentralizasaun Governu Lokal nee salienta, aleinde proposta husi Suku lima kona-ba reativa Postu Kelikai Antigu, Bispo Dom Carlos Filipe Ximenes Belo mos halo rekomendasaun liu husi akompanhamentu dokumentus prinsipal balun relasiona funsionamentu Postu Kelikai Antigu iha tempu pasadu liu ba, nunee Governu foti dezisaun hodi atur hikas Postu refere no iha tinan 2024 konstrui edifisiu ba Administrasaun Postu nian neebe iha loron 27 Junhu nee Governu ofisializa funsionamentu Administrasaun nian liu husi entrega edifisiu Postu ba Autoridade Postu hodi utiliza ba servisu Administrasaun nian.
António konsidera, edifisiu Postu foun refere nuudar espasu ba funsionariu sira hodi presta servisu atende komunidade nian iha baze kona-ba efisiensia no efetivu
“Hau nia observasaun povu kontente tebes, tanba iha ukun aan atur hikas fila fali Postu Kelikai Antigu,” katak Diretor Jeral António.
Administrador Postu Kelikai Antigu, Francisco Matias Gusmão “Junior” deklara katak, administrativamente Postu Kelikai fahe ba postu tolu, maibe kulturalmente nafatin unidu no firme Kelikai ida deit, tanba Kelikai iha rasik nia istoria pasadu neebe la hateten fahe malu no la haluhan mos Suku Tekinomata, Samari no Lavateri.
“Ita restaura fila fila Kelikai Antigu hanesan Postu, Administrativamente kabe kompetensia Governu, mais kulturalmente insiativa mai husi komunidade Suku Ualu Liurai tasi, foho no kapitaun segunda linha inklui Koronel sira hola parte iha serimonia nee halo ofisializasaun Kelikai Antigu neebe harii husi raan no ruin inklui aswain sira nia ulun harii Kelikai Antigu,” hateten Junior.
Junior argumentu, liu husi konstrusaun edifisiu foun ba Autoridade Postu Kelikai Antigu bele ajuda ona servisu, tanba iha ona infraestrutura hodi utiliza halo atendimentu ba komunidade sira.
Habitante Postu Kelikai Antigu, Amaro Ximenes agradese ba VIII Governu Konstitusional nia esforsu hodi estabelese hikas Postu Kelikai Antigu neebe ofisializa husi IX Governu Konstitusional liu husi inaugurasaun edifisiu postu iha loron 27 Junhu nee.
“Estabelesimentu postu ida nee ajuda ona ami, tanba durante nee ami lao dook ba Kelikai mak asina surat, maibe agora ami lao besik ona, tanba edifisiu iha ona,” Amaro Ximenes espresa.
Entretantu edifisiu Postu Kelikai Antigu konstrui husi kompanhia lokal Delatina Unipesoal Limitada ho valor orsamentu US$ 236,108.00 neebe remata konstrusaun iha tinan 2024 no entrega ba Governu hodi ofisializa iha loron 27 Junhu tinan nee.
Serimonia ofisializa nee reprezentante Governu Sentral husi Diretor Jeral Dezentralizasaun Administrasaun Lokal akompanha husi Prezidente Autoridade Munisipiu Baukau inklui Autoridade Sivil no Militares sira neebe hetan partisipasaun masimu husi komunidade joven feto mane no estudante sira.
(tom)
