BAUKAU, STLTIMORLESTE.com – Kada tinan komunidade sira iha Postu Administrativu Kelikai Antigu obrigatoriu tenke sosa bee moos, tanba bee matan sira neebe eziste kuaze maran.
Administrador Postu Kelikai Antigu, Francisco Matias Gusmão “Junior” hateten, komunidade Postu Kelikai Antigu durante nee utiliza deit bee matan periodiku neebe eziste deit iha tempu udan, maibe durante tempu bailoron komunidade Postu Kelikai Antigu halerik ba bee moos, tanba bee matan periodiku sira kuaze maran.
“Liu-liu bee moos, entrada fulan Junhu too Dezembru laiha ona bee matan ida atu asesu, dalan ikus ita nia komunidade sira halo mak bolu tanki bee moos,” hateten Junior ba jornalista STL iha Kelikai Antigu, Domingo (29/06/2025).
Nia sublina, komunidade hirak neebe kada tinan inisiu fulan Junhu too Dezembru sosa bee moos husi Bombeiru faan bee moos, nee mak hirak neebe iha rendimentu natoon, enkuantu komunidade sira neebe laiha rendimentu obrigatoriu desloka ba area Samaguia, Suku Tekinomata, Postu Administrativu Laga hafoin kuru bee moos hodi utiliza ba nesesidade sira.
Nia fundamenta, kestaun bee moos kada tinan enfrenta ba komunidade sira, liu-liu komunidade kbiit natoon sira, tanba lao distansia dook hafoin asesu bee moos.
“BTL tenke seriu haree asuntu nee, tanba pedidu ba tiha ona, husi sira mai halo verifikasaun no survei identifika bee matan ruma kanaliza ba komunidade sira,” Junior argumentu.
Autoridade masimu Postu Kelikai Antigu nee husu ba Autoridade Bee Timor Leste Empreza Publiku atu haree kestaun refere liu husi kanalizasaun bee moos ba komunidade sira.
Habitante Kelikai Antigu iha Suku Gurusa, Francisco Urbanu Moreira hateten, antes nee parte kompetente sira kanaliza ona bee matan Uasunana neebe lokaliza iha foho leten ba komunidade sira iha Suku Afasa, Gurusa no Suku Namanei balun, maibe fasilidade neebe iha halo estragus husi ema deskonhesidu sira, tanba nee iha tempu bailoron komunidade sira enfrenta problema bee moos.
“Postu Kelikai Antigu difikulta ida mak bee moos nee, ate a data komunidade neebe iha ekonomia sufisiente bolu kareta husi Baukau Vila mak sira sosa, neebe ami nia rekomendasaun ba Ministeriu kompetente halo reabilitasaun para bee nee too mai Postu,” Francisco rekomenda.
Liga asuntu nee STL seidauk halo konfirmasaun ho parte BTL.EP Munisipiu Baukau, tanba loron Domingu tempu feriadu.
Entretantu Postu Administrativu Kelikai Antigu daudaun rejistu habitante liu rihun hitu husi Suku tolu mak hanesan Suku Afasa, Namanei no Gurusa enkuantu Suku Abafala no Uaitame sei iha faze tranzitoria.
(tom)
