DILI, STLTIMORLESTE.com – Primeiru Ministru (PM), Kay Rala Xanana Gusmão deklara ona katak, fulan Outubru Oekusi oan mak kaer Administrasaun, hatan ba kestaun nee Prezidente Autoridade Rejiaun Administrativa Espesiál Oekusi-Ambeno (RAEOA), Rogeiro Lobato hatete, nia ba atu servisu laos buka fatin.
Prezidente Autoridade RAEOA, Rogeiro Lobato hatoo kestaun nee ba jornalista sira iha Tribunal Primeiru Instansia Dili, Kaikoli, Segunda (30/06/2025) hatete, se Primeiru Ministru mak deklara ona troka nia parte hein deit too Outubru mak haree tok desizaun, maibe nia parte ba atu servisu laos buka fatin, tanba nia familia mate hotu ba rai nee atu ba servi.
Se Primeiru Ministru mak dehan atoni oan mak kaer rasik administrativu RAEOA, nee hein deit desizaun.
“Hau laos aseita, hau simu mandatu ida ba tinan 5 agora defende ba senhor Primeiru Ministru neebe hau hein deit too Outubru mak ita haree, maibe hau nia mandatu seidauk remata,” dehan PR RAEOA.
Foin lalais Primeiru Ministru deklara ona katak, mandatu Prezidente RAEOA too deit Outubru, oinsa parte ita nia? hatan ba kestaun nee Prezidente Autoridade RAEOA hatete, se Primeiru Ministru mak dehan too Outubru mak haree tok, maibe nia ba atu servisu ba povu Oekusi.
“Hau ba iha neeba atu servisu ba Oekusi, hau prontu saida deit, hau laos buka fatin, hau ba tanba familia mate hotu ba rai ida nee, foti hau ba servisu iha neeba hau prontu atu servisu, mezmu ho tinan ida mos hau prontu nafatin atu servisu ba Timor,” katak Prezidente RAEOA.
Durante mandatu iha RAEOA progresu saida mak halo ona iha neeba, hatan ba kestaun nee tanba saida la ba too Oekusi atu haree, haree estrada iha Oekusi halo ka lae, estrada iha foho sira nee halo ka lae, presiza ba investiga ba haree direita laos rona deit.
Signifika katak iha mandatu halo hela estrada iha area rurais sira iha Oekusi, hatan ba kestaun nee Prezidente Autoridade RAEOA hatete, atividade halo estrada lao hela.
“Labele husu mai hau, ita boot sira ba iha Oekusi ba iha jona rurais koalia ho katuas ferik ema sira neebe uluk sai husi foho tun mai iha sidade la diak agora nee lao halo nusa, bainrua hau ba loke estrada husi Oenunu ba Citrana, estrada emerjensia tanba agora husi parte Makasar ba Ustako iha netik foho 45 minutus deit uluk 2 ou 3 oras mak too iha foho agora loke fali Citrana tanba ema koalia barak kona-ba naktuka,” katak PR RAEOA.
Prezidente Autoridade RAEOA hatetete, iha nia mandatu oras nee ema balun neebe uluk la halo natar agora bele halo natar kuda haree, kontinuasaun projetu sira paralizadu nomos projetu seluk tan.
“Hotel Oepo gasta US$ 14 milhoens abadonadu, agora ita sei halo hotel ida ke diak liu iha Timor quatru sentos kuartus ema komesa halo ona Aeroportu, halo tiha gasta US$ 130 milhoes paradu besik tinan 10, fulan oin ita halo sertifikasaun para aviaun sira iha liur bele tun direitamente iha Oekusi, ita sei iha imigrasaun rasik alfandega rasik, neebe servisu neebe ami bele halo mak nee,” katak nia.
Nia hatete, jardim Lifau paradu maibe agora halo jardin ida oin seluk, halo Kalvariu ho kruz ida ho 600 metru ho kristus pragado atu promove turizmu relijiozu, buat sira neebe bele halo bele halo.
Foin lalais Primeiru Ministru Kay Rala Xanana Gusmao deklara katak, durante nee Oecusi oan lamenta tanba iha munisipiu seluk ema rai nain mak jere sira nia administrasaun, maibe iha Oecusi ema seluk mak jere fali, tanba nee iha fulan Outubru sei delega Atoni oan mak jere rasik, tanba sira mak hatene klean preokupasaun povu Oecusi nia.
(eme)
