DILI, STLTIMORLESTE.com – Ministeriu Edukasaun (ME) husu eskola neebe menus livru manual, sira tenke halo pedidu mai ministériu.
“Hau hanoin ita nian eskola neebe mak laiha livru manual, eskola rasik halo pedidu mai iha diresaun, depois husi diresaun hatoo ba iha Kurikulu, atu nunee bele distribui livru ba eskola sira, tanba livru iha hela, nee duni eskola hatete mai ami katak, dadus falta livru nee iha neebe, eskola sira nee tuan, laos eskola foun, entaun sira mak hatene falta livru nee, halo pedidu mai ME,” afirma Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL iha nia knaar fatin Vila Verde, Tersa nee (01/07/2025).
Nia akresenta, livru ba nivel sekundariu nee produs iha sentru impresaun hela, maibe husi ministeriu mos hein hela dadus husi eskola mai katak, sira presiza livru hira, atu nunee ministeriu fo livru bazeia ba sira nian pedidu neebe mak mai, kuandu pedidu mai ona nee Ministériu fo apoiu livru ba eskola sira.
“Nee duni ami husu eskola neebe mak seidauk ou menus livru, sira tenke hatoo pedidu mai ami, labele ita koalia deit livru menus, nee sira tenke hatoo Karta mai, nunee mos meza no kadeira, presiza halo karta mai, labele dehan menus deit, ita Timor nee gosta hakilar deit, maibe lakohi halo pedidu mai,” nia dehan.
(jac)
