DILI, STLTIMORLESTE.com – Prezidente Republika (PR), Jose Ramos Horta hatete, Institutu Defeza Ba Direitu Labarik (INDDICA) luta makaas hodi hapara labarik faan iha dalan ninin, maibe Prezidente Republika kontinua apoiu labarik, tanba nee hanesan atividade apoiu familia.
Prezidente Republika Jose Ramos Horta hatoo kestaun nee ba jornalista sira iha Kantina Matak Palasiu Prezidensial Nikolao Lobato, Bairo Pite Tersa nee (01/07/2025).
Se karik INDDICA nee mak halo karik proposal ruma hatete katak labarik ou kosok oan sira labele faan manu tolu ka sasan tanba INDDICA iha programa ida diak tebes para sira loraik halimar estuda, maibe programa nee laiha maibe hakarak bandu labarik.
“Laiha tanba kuaze bele hatete inposivel ita seidauk iha meius no rekursu ba area Timor tomak iha atividade extra eskola ke labarik sira ba eskola remata eskola ba halo atividade oin-oin nee iha teoria kapaas los, haree balun resposta iha media sosial nee alin feto ida kontente, sorte eskola iha inglatera dehan lo-loos nee labarik sira nee estuda matematika, ai ama entaun loke eskola matematika ba sira.
Prezidente dehan, nia halo buat neebe nia bele hahu primeiru mandatu Prezidente loke eskola espesial iha jardim Palasiu Prezidensial labarik sira remata eskola sira ba aprende português, ingles, komputador, muzika, nee Governu bele halo iha Timor laran tomak, se la halo ida nee entaun kosok oan sira halo saida.
Iha uma halimar ho busa asu joven kalen ou tuda fatuk diak liu hetan osan oituan husi inan aman ba sosa manu tolun faan buat neebe kmaan.
“Nee sai hanesan edukasaun ba sira aprende ona bisnis, labarik oan sira matenek tebes displina, sira lori osan oituan ba uma US$ 3 ou US$ 5, balun liu tan, se INDDICA dehan labele entaun labarik sira halo saida, se dehan labele faan INDDICA apela ba sosiedade atu buikota nee hanesan buikota labarik sira nia bisnis, entaun prontu labarik sira ba tane liman esmola saida mak diak liu, ita haree labarik sira nadodon iha Dili laran tane liman eskola ba turista sira hanesan rai seluk iha mundu kiak rabat rai lae, Timor oan orgulhu tebes buat ida ke ema hotu admira, admira tebes iha TL,” Dehan PR Horta.
Prezidente Republika hatete, buat neebe ema hotu admira mak iha Timor Leste laiha labarik tane liman husu esmola, ema la tane liman rai nee kiak lo-loos haree ida neebe rihun ba rihun tane liman maibe laiha labarik sira jere rasik faan manu tolu faan hahan hodi manan osan.
“Hau apoiu ida nee, INDDICA diak liu estuda didiak sukat buat neebe sira halo, se lae hau mak lobi Governu koa sira nia orsamentu ba ida nee, hau sei kontinua apoiu labarik sira faan Domingu, hau hasoru balun hau sosa sasan hotu neebe labarik sira faan iha area Kristu Rei neeba ate tula tan sira,” katak PR Horta.
PR dehan, kontinua apoiu labarik sira neebe mak faan iha dalan ninin, tanba nee sai hanesan kursu ida ba sira oinsa aprende negosiu, aprende manan vida ho kmaan laos atu ba kee rai henek ka hili fatuk iha mota Komoro.
Prezidente hatete, se bandu fali labarik sira nee Prezidente la fiar no Prezidente husu diak liu hela no diak liu sulan aan iha oficce lalika koalia mangame tunsae, se la hatene diak liu koalia ho Prezidente.
“Agora sira halo fali no apelu fali ba publiku labele sosa sasan husi labarik sira nee buikota fali labarik sira, ita bele tau iha Headline nee ita boot sira nia jornal INDDICA hatete buikota kosok oan sira nee, buikota kosok oan sira depois sira nia spanduk nee mos halo aas los tau iha fatin aas ema atu haree mos la konsege, laiha ema ida atu rona fali INDDICA nia koalia nee, diak liu haree programa ruma konstrutivu kreativu para entertain labarik sira,” katak PR Horta.
Foin lalais Ekipa konjunta husi INDDICA ho Ministeriu Solidariedade Sosial no Inkluzaun (MSSI) hamutuk ho eskuadra PNTL Timor Leste Don Alexo identifika labarik neebe mak faan sasan iha estrada ninin maioria husi Oekusi oan.
Tuir Xefe Monitorizasaun INDDICA, Isaias Pereira ba jornalista hatete, iha tinan 2025 INDDICA koordena ho ekipa Oekusi atu halo ajustamentu ba labarik sira husi Oekusi neebe barak hela iha Dili.
“Dadus fo hatene katak labarik 39 husi Oekusi mak identifika iha estrada ninin maibe ita seidauk identifika munisipiu seluk,” dehan nia.
(eme)
