DILI, STLTIMORLESTE.com – Ministeriu Edukasaun (ME) sei asegura estudantes husi eskola Rainha da Paz ba eskola neebe mak besik.
“Ida nee eskola neebe ho nia estatutu privadu, buat ida neebe importante liu mak ita tenke asegura ita nian estudantes sira, tanba la kleur tan ezame perioridika lao, tanba nee mak hau orienta ona diretor jeral no diretor nasional atu nunee kontaktu ona munisipiu, hakarak ka lakohi, se fundasaun mak problema, sira rezolve sira nian problema, ita tenke asegura ita nian estudantes iha eskola neebe besik,” dehan Ministru Edukasaun Interinu, Domingos Lopes Lemos ba jornalista iha ESJ Komoro, Tersa nee (01/07/2025).
Iha fatin seluk, Prezidente Komisaun G neebe trata Asuntu Edukasaun Juventude Kultura no Sidadania iha Parlamentu Nasional (PN), Armando Lopes hateten, Komisaun G sei bolu Ministeriu Edukasaun (ME) atu diskute kona-ba prosesu aprendizajen iha eskola Sekundaria Rainha da Paz oras nee paradu hela tanba polemika kona-ba rai.
“Maibe ami ezije eskola nee ninia prosesu aprendizajen tenke lao, depois iha fulan Janeiru mai mak ita bele rezolve problema nee, mas prosesu aprendizajen tenke lao. Tanba nee mak horiseik ami koalia daudaun ona, Segunda ami aselera atu bolu Ministeriu Edukasaun no fundasaun eskola mai iha komisaun hodi obriga prosesu aprendizajen tenke lao,”nia esplika.
Nia akresenta, eskola refere laos eskola publiku mas eskola privadu neebe mak harii husi yayasan, yayasan nee sira mai regulamentu ida konjunta, tanba ida nee mak Komisaun G sei bolu sira mai atu haree problema refere. Ezemplu sira halo kompromisu ho nain ba rai, loke eskola nee sira nia akordu oinsa ho legalmente mas tenke ho eskrita para hodi hatene nunee halo prosesu.
(jac)
