DILI, STLTIMORLESTE.com – Ministeriu Edukasaun (ME) liu husi Gabinete Avaliasaun Lisensiamentu no Akreditasaun (GALA) sei halo kontrola ba eskola públiku no privadu.
“Ita monitoring nee fazeadamente, tinan ida nee ba iha eskola internasional, depois ita sei haree, bainhira ita finaliza hotu ida nee no ita bele hakat ba iha eskola publiku no privadu sira nee, tanba nee ita sei finaliza uluk lai eskola internasional sira nee, ninia objetivu husi GALA halo kontrolu ba eskola privadu no publiku sira nee, oinsa bele asegura kualidade eskola sira nee,” dehan Koordenador Gabinete Avaliasaun Lisensiamentu no Akreditasaun (GALA), Antonio Tomas Maia hatoo kestaun nee ba jornalista STL iha nia knaar fatin Vila Verde, Kuarta nee (02/07/2025).
Nia dehan, oinsa eskola sira bele hadia ninia kualidade sira nee, ida nee mak GALA nia objetivu atu halo kontrolu ba eskola públiku no privadu sira neebe tuir planu GALA sei halo kontrolu.
“Nee duni ita halo kontrolu, depois ita halo avalia, nunee ita fo rekomendasaun ba ita nian eskola sira nee, ho nunee sira bele hadia saida mak ita rekomenda ona ba sira, nee duni ami sei halo kontrolu ba ita nian eskola públiku no privadu,” nia haktuir.
Iha fatin seluk, Diretor Eskola Sekundáriu Nobel da Paz, Jeremias P. de Jesus hatete, nuudar eskola privadu, oinsa atu kria kondisaun no prepara fasilidade neebe diak ba estudantes sira, atu nunee bele garante ba kualidade neebe mak diak, agora Ministeriu Edukasaun liu husi GALA atu halo kontrola ba eskola, ida nee sira nia kompetensia.
(jac)
