DILI, STLTIMORLESTE.com – Atu halo konstrusaun ba estádiun iha Tasi Tolu, Ministru Justisa deklara katak, sei iha hela prosesu levantamentu.
“Prosesu levantamentu lao hela, sira halo hela levantamentu, se rai ida nee liu husi levantamentu liu husi estudu sira, hotu-hotu dehan la iha problema ita oferese ba iha dezenvolvimentu, katak nee tama iha dominiu Estadu,” dehan Ministru Justisa, Sergio Hornai ba jornalista sira iha Kaikoli, Kuarta (02/07/2025).
Nia hatutan, se rai Estadu nian buka esforsu, atu providensia ba Estadu atu halo atividade dezenvolvimentu.
Esplika tan, fatin ida nee istoriku, ita halo atu fatin istoriku nee labele lakon nia istoriku, katak valor ida neebe prezerva nee tenke prezerva nafatin, maibe moderniza fatin nee atu labele sai moderniza, maibe konserva nafatin valor istriku nian.
Ministru Justisa reforsa, halo atu fatin nee nakfilak fali, labele book altar neebe iha, maibe estadiu nee bele nakfilak hanesan misa boot sira bele absorve ema barak bele halo iha neeba, katak rai nee labele toba maibe dezenvolve rai nee atu nia kontein husi dezenhu nee tenke prezerva nafatin, ita nia valor istoria kultura atu memoria sira nee labele lakon.
Aleinde nee Sua Eminencia Dom Virgílio Cardeal do Carmo da Silva dehan, nia parte labele fo lai komentariu, tanba seidauk simu dadus kompletu.
“Hau rona duni maibe hau seidauk iha dadus kompletu, entaun hau seidauk komentariu diak kona-ba ida nee, hau rona dehan iha parte ida neebe, iha neebe hau buka atu komprende lai molok fo komentariu,” dehan Amu.
Antes nee Governu Timor Leste liu husi reuniaun Konselhu Ministru aprova ona proposta Federasaun Futebol Timor Leste (FFTL) nian, neebe atu halo reabilitasaun ba Estadiu Munisipal Dili no halo tan konstrusaun foun ba Estadiu ho kampu futsal indoor padraun internasional iha Tasi-tolu, Dili.
(ter)
