DILI, STLTIMORLESTE.com – Vise Prezidente Senadu Malazia, Datuk Nur Jazlan bin Tan Sri Mohamed hatete, Malazia firme apoiu Timor Leste (TL) nia adezaun ba Asosiasaun Nasaun Sudeste Aziatiku (ASEAN).
Vise Prezidente Senadu Malazia, Datuk Nur Jazlan bin Tan Sri Mohamed hatoo kestaun nee bainhira halo enkontru ho Prezidente Republika, Jose Ramos Horta iha Palasiu Prezidensial Nicolau Lobato.
Iha hasoru malu nee, Vise Prezidente Senadu Malazia, Datuk Nur Jazlan bin Tan Sri Mohamed hatete, Malazia reafirma apoiu firme husi Malazia ba adezaun tomak Timor Leste nian ba ASEAN.
Bainhira remata halo enkontru, Vise Prezidente Senadu Malazia, Datuk Nur Jazlan bin Tan Sri Mohamed ba jornalista sira iha Palasiu Prezidensial Nikolao Lobato, Bairo Pite Tersa (01/07/2025) hatete, Primeiru Ministru Malaiu, Anwar Ibrahim halo ona esforsu estra ida hodi promove Timor Leste nian integrasaun iha organizasaun rejional nee.
“Malazia iha kompromisu boot apoiu Timor Leste nia adezaun ba ASEAN, apoiu nee bazeia iha lasu kultural no istoriku sira neebe klean hodi kesi nasaun rua nee,” katak nia.
Aleinde nee Prezidente Republika Jose Ramos Horta deskreve nasaun rua nee hanesan parte ida husi rumpun espresaun ida neebe reprezenta família hanesan nasaun ida nian, destaka katak afinisaun kultural no rejional oferese fundasaun metin ida ba parseria estratejika no ba progresu hamutuk rejiaun nian.
Durante diskusaun neebe produtivu, Xefe Estadu hatoo ninia konfiansa boot ba knaar Timor Leste nian iha futuru iha bloku nia laran. Konfiansa ida nee fahe husi Vise Prezidente Senadu Malazia nian, neebe afirma fiar katak Timor Leste sei sai parseiru diak iha ASEAN, prontu atu kontribui ba objetivu no prosperidade komunidade rejional nian hotu.
(eme)
