DILI, STLTIMORLESTE.com – Mianmar ofisialmente informa ba Malazia la suporta adezaun Timor Leste nian iha fulan Outubru, ho karta nee Prezidente Republika Jose Ramos Horta hatete, deklarasaun la fo impaktu tanba desizaun husi Xefe Estadu ASEAN foti ona iha semeira neebe halao iha Kuala Lumpur.
Prezidente Republika, Jose Ramos Horta hatoo kestaun nee ba jornalista sira iha Palasiu Prezidensial Nikolao Lobato, Bairo Pite, Kuarta lokraik (02/07/2025) hatete, komunikadu husi Mianmar la konkorda Timor Leste adere ba ASEAN iha fulan Outubru ida nee labele espekula barak tanba desizaun Timor Leste tama formalmente tama ASEAN halo tiha ona, Nivel Xefe Estadu iha Kuala Lumpur Malazia, desizaun halo ona no sai ona komunikadu final marka iha fulan Outubru.
Prezidente Republika hatete, agora daudaun Timor Leste halo hela preparasaun ba serimonia Timor Leste adere ba ASEAN iha fulan Outubru, se rai ruma la partisipa iha Simeira iha Kuala Lumpur nee sira nia problema, no Mianmar mos la partisipa tinan 3 ona, tanba golpe iha 1 Fevereiru 2021, simeira ASEAN la konvida sira partisipa iha simeira, bele partisipa deit hanesan nivel tekniku senior MNEK nia.
PR Horta dehan, Mianmar la partisipa simeira tinan 3 ona, kuandu simeira ida Xefe Estadu halo ona desizaun, tanba nee komunikadu Mianmar nia laiha signifikadu, laiha kualker importansia, tanba nee husik ba Prezidensia ASEAN mak bele responde ba Mianmar, maibe desizaun Timor tama ASEAN nee desizaun husi simeira Xefe Estadu, tanba nee Timor Leste nia preparasaun nafatin tama iha Outubru 2025.
Entaun signifika katak deklarasaun husi Mianmar neebe mak la apoiu Timor Leste adere ba ASEAN iha fulan Outubru nee la fo impaktu ba Timor Leste adere ba asean ka oinsa? Hatan ba kestaun nee Prezidente hatete la fo impaktu.
“Lae, laiha desizaun halo tiha ona Xefe Estadu nia, tanba golpe halo tinan 3 liu ba nee ASEAN rasik iha simeira iha Jakarta halo desizaun Mianmar la hetan konvite atu partisipa iha simeira Xefe Estadu ASEAN nian, ate sira kumpri implementasaun pontu 5 konsensus atu rezove kestaun iha Mianmar,” katak Prezidente Republika.
Prezidente dehan, deklarasaun husi Mianmar nee husi se, Prezidente la hatene, jeneral militar mak ukun agora ou Ministeriu Negosiu Estranjeiru Mianmar nia nee irrelevantes laiha konsikuensia ruma, tanba simeira Xefe Estadu ASEAN nia ou Timor Leste nia partisipasaun neebe halo iha Kuala Lumpur daudaun nee validu.
Aleinde nee Mianmar mos ofisialmente informa ba Malazia atual Prezidente ASEAN katak sei la suporta adezaun Timor Leste nia iha fulan Outubru tuir fonte sira neebe konfirmadu.
Posizaun Ofisial Naypyidaw nia foin daudaun hatete ba Malazia katak, Timor Leste la konsege adere ba prinsipiu non interferensia iha asuntu internu sira hanesan konsagradu iha karta ASEAN nia.
(eme)
