DILI, STLTIMORLESTE.com – Prezidente Republika (PR), Jose Ramos Horta husu Governu presiza halo prevensaun ba Virus Rabies neebe mak oras nee hamate ona sidadaun Timoroan.
Prezidente Republika Jose Ramos Horta hatoo kestaun nee ba jornalista sira bainhira halo ankontru ho jornalista destakadu iha Palasiu Prezidensial Nikolao Lobato, Bairo Pite, Kuarta lokraik (02/07/2025).
Prezidente Republika hatete, Virus Rabies nee hanesan pandemia ida, tanba nee Governu liu husi Ministeriu Saude presiza iha alternativa hodi bele prevene.
“Kazu Moras Rabies nee hahu kleur ona iha Indonezia, fulan lubuk ida liu ba hau rasik haruka mensajen alerta ba ita nia setor saude para haree, sira hatete ami akompanha problema neebe seidauk iha Timor Leste, hau labele fo informasaun ruma tanba hau laiha informasaun, Governu halo saida para prevene tanba nee sai pandemia ida,” dehan Prezidente Republika.
Prezidente Republika hatete, Virus Rabies nee sai hanesan pandemia ida tanba asu iha Timor Leste badiu ba mai, maibe iha rai seluk asu la sai ba pasiar iha liur ba vizita asu seluk.
“Iha Timor nee runguranga los, uluk fahi sira mak kontrola Dili, Ministeriu Saude uluk kleur ona tinan 10 no 15 liu ba tempu doutor Rui Aroujo nia hasai ordem ida para konfista fahi sira iha luron, entaun tauk sulan fahi agora la hetan ona fahi, maibe asu kontinua nafatin nee mak perigu fasil atu kontrola, se hotu-hotu kaer metin asu iha uma, maibe la hatene parte saude halo saida atu kontrola bele sai pior liu tan,” katak nia.
Prezidente Republika hatete, Moras Rabies numeru kontinua aumenta maibe laiha aimoruk atu prevene, ida nee mak susar, tanba nee Governu liu husi Ministeriu saude presiza tau atensaun.
(eme)
