DILI, STLTIMORLESTE.com – Uniaun Europeia (UE) iha kompromisu boot apoiu Timor Leste (TL) liu husi apoiu tekniku no politiku nunee TL bele adere lalais ba ASEAN.
Lia hirak nee hatoo husi Embaixador Uniaun Europeia mai Timor Leste, Marc Fiedrick ba jornalista sira bainhira remata simu kondekorasaun Kolar Ordem Timor Leste husi Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kuarta lokraik (02/07/2025).
“Ohin hau haksolok tebes tanba hau remata tinan 3 servisu iha Timor Leste, hau hanoin katak ami nia ezistensia iha Timor Leste furak liu no hau apresia barak ema sira iha TL, hau hanoin relasaun Uniaun Europeia ho Timor Leste durante tinan 3 dezenvolve diak no hau kontente tebes tanba hau haree semana uluk vizita MNEK iha Bruselas no hau kontente haree iha tema barak UE kolabora ho TL iha mudansa klimatika dezenvolvimentu sosial no ekonomiku,” katak Embaixador.
Nia hatete, sente kontente tebes tanba Timor Leste mos adere ona ba ASEAN iha fulan Outubru, no nia mos haree durante tinan 3 iha Timor Leste dezenvolvimentu sai importante.
Nia hatete, relasaun Timor Leste ho Uniaun Europeia idak-idak ho nasaun neebe mak hakarak koopera servisu hamutuk oinsa sai metin liu tan iha futuru.
“Uniaun Europeia apoiu liu husi asistensia teknika, no ami apoiu iha area politiku ba asesu Timor Leste ba ASEAN, maibe entidade kooperasaun nasaun diferentes mos fo apoiu laos Uniaun Europeia deit,” katak Embaixador.
Nia hatete, servisu nee importante liu husi funsionariu sira Timor Leste oinsa mak bele kumpri lalais rekezitus ASEAN.
“Hau espera katak iha futuru ema iha Timor Leste bele aproveita bainhira Timor Leste adere ona ba membru Full ASEAN,” hakotu nia.
(eme)
