BAUKAU, STLTIMORLESTE.com – Deskonfia osan merenda eskolar ba Ekipa Jestaun Programa (EJP) eskola Katolika Santa Ursula Vila Nova Baukau hodi jere no implementa merenda eskolar iha faze segundu nee hamutuk US$ 840.00 resin lakon, neebe kauza estudante sira loron tolu han deit sasoro no too daudaun nee programa merenda eskolar refere paradu.
Koordenadora EJP Merenda Eskolar Santa Ursula Vila Nova Baukau, Sandra Martignonia de Oliveira Ruas esplika, EJP eskola Santa Ursula Vila Nova Baukau jere programa merenda eskolar ba eskola haat (4) ho total estudante 686 kompostu eskola pre-eskolar Santa Ursula Vila Nova ho total estudante 180, eskola pre-eskolar João Paulo II ho total estudante 114, eskola Ensinu Baziku Primeiru Segundu no Terseiru Siklu Santa Ursula Vila Nova ho total estudante 688 inklui eskola Ensinu Baziku Primeiru Segundu Siklu Al Amal Baukau ho total estudante 227.
Nia sublina, husi numeru estudante refere faze segundu implementasaun programa merenda eskolar tuir lo-loos ho alokasaun orsamentu hamutuk US$ 20.278,56, tanba kada loron estudante nain ida hetan 0,42 sentavus ba loron efetivu 40, maibe alokasaun orsamentu refere la too rihun US$ 20 resin ba loron efetivu 40 nian, tanba alokasaun orsamentu too deit US$ 19.438,56 no osan kuaze US$ 840,00 lakon.
“Etapa segundu nian nee osan kuazu US$ 840,00 mak laiha, hau la hatene kestaun tanba sa, maibe ami ba banku foti osan, osan nee deit la too ba ami nia estudante, quer dizer ami nian 50 pesoas mak la haan, entaun hau konfirma ba Xefe Departamentu Merenda Eskolar Edukasaun nian, sira dehan ita halao tuir deit, maneza tuir buat neebe ita bele, no hau mos konfirma Xefe WFP nia mos dehan liafuan hanesan, katak jere deit osan neebe fo, entaun ami jere deit loron tolu labarik sira han sasoro,” hateten Sandra ba jornalista sira iha Vila Nova Baukau, Kinta (03/07/2025).
Nia fundamenta, labarik estudante nain 50 neebe durante faze segundu la hetan direitu alokasaun orsamentu husi Programa Merenda Eskolar husi Eskola Pre-eskolar João Paulo II nain 20 no eskola Pré-eskolar Santa Ursula nain 30, maibe ekipa jere orsamentu hodi responde ba estudante sira liu husi fornese sasoro durante loron tolu ikus husi loron efetivu 40.
Nia argumenta, relasiona osan Merenda Eskolar ba estudante nain 50 ho total US$ 840,00 laos lakon iha banku, maibe liu husi konfirmasaun ho responsabilidade programa merenda eskolar iha Servisu Edukasaun Munisipiu Baukau deklara, alokasaun orsamentu faze segundu implementasaun programa merenda eskolar iha Santa Ursula Vila Nova Baukau ho total rihun US$ 19 resin, maibe tuir lo-loos faze segundu tenke ho alokasaun orsamentu rihun US$ 20 resin, tanba bazeia ba numeru estudante.
“Prosesu manda osan nee oinsa ami mos ladun hatene, husi Autoridade Munisipiu mak ba Edukasaun ga oinsa ida nee ami la hatene, neebe osan too iha Edukasaun mak lakon ga too iha banku oinsa, maibe laos lakon iha banku, tanba hau konfirma ho banku osan tama mak sekian duni,” Sandra akresenta.
Koordenadora EJP Eskola Santa Ursula nee deklara, implementasaun programa merenda eskolar ba faze datoluk nian, parte EJP eskola hamutuk ho fundasaun eskola asina ona kontratu ho Servisu Munisipal Edukasaun Baukau, maibe parte edukasaun seidauk fo informasaun, tanba nee husi loron 01 too 03 Julhu nee seidauk implementa programa merenda eskolar, maibe seidauk hatene klaru kauza la implementa programa refere.
Diretor EPE Santa Ursula Vila Nova Baukau, Julieta Freitas esplika, implementasaun programa merenda eskolar faze segundu husi fulan Maiu too Junhu ba loron efetivu 40, mosu preokupasaun iha eskola Katoliku Santa Ursula Vila Nova Baukau, tanba durante loron tolu ikus husi loron efetivu 40 estudante sira han deit sasoro, tanba osan Merenda Eskolar ba estudante nain 50 lakon.
Nia sublina, tuir informasaun husi nasional orsamentu ba programa merenda eskolar iha Santa Ursula Vila Nova Baukau ho montante fiksu tuir numeru estudante, maibe bainhira ekipa jestaun programa merenda eskolar too iha banku foti osan refere falta US$ 800.00 resin.
“Osan nee EJP telefone kedas ba Munisipiu, telefone kedas mos ba Nasional, Nasional dehan osan nee haruka tiha ona mai munisipiu pas, maibe munisipiu fo fali ba sira iha banku foti nee mak osan menus iha nee, depende EJP fo hatene ami nee hanesan nee,” haktuir Julieta.
Diretora Esakola Pre-eskolar Santa Ursula nee rekomenda ba Servisu Munisipal Edukasaun Baukau atu fo labarik estudante sira nia direitu liu husi programa merenda eskolar ho loos, nunee labarik estudante sira sente seguru, tanba durante loron efetivu 40 ikus labarik sira han menus.
Inan estudante, Dália de Almeida sente triste observa implementasaun programa merenda eskolar iha elEskola Santa Ursula Vila Nova Baukau, tanba orsamentu neebe Governu aloka ba estudante sira iha faze segundu implementasaun merenda eskolar la too tarjetu ba numeru estudante nian, nunee obrigatoriu estudante sira iha Eskola Santa Ursula Vila Nova Baukau lakon direitu ba programa refere iha loron balun.
“Ami husu hadia merenda eskolar, se bele aselera lalais para sira bele han fila hanesan baibain no labele lakon merenda eskolar nee, tanba importante mos ba sira nia saude, se sira paradu hanesan nee dala ruma afeta mos ba sira nia saude,” Dália rekomenda.
Liga asuntu nee STL tenta konfirma Diretor Servisu Munisipal Edukasaun Baukau, maibe laiha fatin atu fo komentariu, tanba tuir informasaun neebe iha Diretor refere sei tuir hela enkontru importante balun iha fatin seluk.
Entretantu liu husi observasaun STL nian iha terenu nota katak, estudante sira iha eskola Katolika Santa Ursula Vila Nova Baukau iha loron 03 Julhu nee obrigatoriu estudante balun sosa hahan hafoin konsumu no estudante balun lori rasik hahan husi uma hodi konsumu iha eskola tempu intervalu nian.
(tom)
