BAUKAU, STLTIMORLESTE.com – Kada loron rai rahun falun negosiante sira iha merkadu foun Tuanau Munisipiu Baukau, tanba laiha bee atu rega estrada neebe tama ba areadores merkadu nian ateru ho rai mutin.
Negosiante iha merkadu Tuanau, Paulina Gusmão informa, durante estabelese merkadu foun Tuanau, negosiante balun iha finanseiru harii rasik nia baraka dignu hodi utiliza ba negosiu, maibe negosiante balun finanseiru menus no la konsege harii baraka dignu obrigatoriu faan sasan iha deit rai.
Nia sublina, durante faan sasan iha merkadu Tuanau sente la seguru, tanba kestaun anin huu makaas lori rai rahun falun negosiante sira, tanba laiha bee utiliza hodi rega rai mutin neebe ekipa jestaun merkadu ateru iha merkadu refere.
“Ami sente rai rahun tun mai nee tama deit ami nia ibun no inus halo ami mear no inus metin, bee laiha atu rega, ami koalia tiha ona mak ema la mai rega, tanba nee ami husu mai rega tiha rai rahun nee,” hateten Paulina ba jornalista STL iha merkadu Tuanau, Kinta (03/07/2025).
Negosiante nee argumenta, preokupasaun refere hatoo ona ba parte jestaun merkadu Munisipiu Baukau, maibe la fo solusaun, tanba nee kontinua husu parte refere halo atuasaun liu husi apoiu rega rai rahun iha merkadu foun refere, tanba kestaun saude publiku.
Nunee mos negosiante Merlinda Maria Ximenes konsidera, kondisaun merkadu Tuanau parte autoridade sira la tau matan, tanba kada loron bainhira anin hu’u kauza rai rahun sae hodi afeta ba negosiante sira nia saude.
“Merkadu ida nee estadu la tau matan, ami tur hanesan nee dala ruma anin hu’u rai rahun suar halo ami mear no inus metin, neebe ami husu ba na’i ulun sira tau matan ami povu tur deit hanesan nee fulan tolu ona, sira nunka haruka bombeiru mai rega merkadu, preokupasaun ami nian tanba bee mak laiha,” hateten Merlinda.
Negosiante nee husu ba parte relevante atu fo solusaun ba problema neebe negosiante sira iha merkadu Tuanau enfrenta, liu-liu bee neebe atu utiliza ba rega rai rahun iha merkadu foun refere.
Tanba estabelesimentu merkadu foun refere too ona fulan tolu, maibe parte kompetente la foti medida hodi halo intervensaun ba rai rahun neebe kada loron sae iha merkadu refere.
Tuir observasaun STL nian iha terenu loron 03 Julhu nee nota katak, dalan entrada ba merkadu foun refere too iha areadores merkadu nian ateru ho rai mutin no negosiante kiik sira liu-liu negosiante modo tahan sira tuur okupa estrada ninin faan sira nia sasan, nunee iha momentu transporte publiku no privadu sira liu falun hela rai rahun ba negosiante sira.
Liga asuntu nee STL tenta konfirma Diretor Servisu Jestaun Merkadu Munisipiu Baukau, maibe lakohi fo komentariu ruma.
(tom)
