DILI, STLTIMORLESTE.com – Tribunal Judisial Primeira Instansia Dili halao julgamentu ba kazu omisidiu simples, neebe komete husi arguidu nain 6.
Tuir akuzasaun neebe Juiz prosesu, Zulmira Auxiladora lee sai katak, iha loron 28 fulan Fevereiru tinan 2024, maizumenus tuku 04:00 dader, vitima Armandino Lemos Soares akompanha husi nia kolega, oras nee sasin Becior Len Mendes da Silva, ho motor lao ba diresaun Bekora ho nasi kuning iha liman.
Antes sai, lezadu dehan ba sasin atu ba Dolok-Oan hodi naok bibi ida, maibe too iha neeba, iha Metiaut, sira konsege naok tiha bibi-ida.
Sira fila husi Metiaut no liu husi rotunda ida. Taibesi hasoru kolega nain rua ho naran Kevin no Dito no lezadu husu ba sira atu akompanha sira ba iha Bekora Klak-Fuik. Nunee, sira ho motor rua liu husi Semiteriu Bekusi.
Kuandu too iha semiteriu nia oin, sira rona sinal husi anguidu sira basa liman no hakilar iha momentu neeba arguidu MX hamriik hela iha estrada ninin, foti fatuk tuda ba lezadu nia oin hodi motor baku fila ba rai, arguidu hakilar ba BdRG, CdCSG, LVS MAS no HdJF hamriik hela iha estrada publiku, tuda fatuk ba lezadu no sasin sira.
Hafoin, arguidu CdCSG tuda tan fatuk ba lezadu, kona iha nia ulun, halo lezadu monu ba rai no halo kanek todan no raan sai, hanesan hatudu iha fotografia sira iha arkivu 93 too 103.
Nuudar rezultadu husi atake sira nee, vitma Amardino Lemos Soares sofre ulun-fatuk nakfera no rai sai makaas no ikus mai vitima lakon vida.
Ho nunee, arguidu nain 6 hanesan MX, BdRG, CdCSG, LVS MAS no HdJF hanesan ko-autor ba materia ho forma konsumada ho krimi Omisidiu Simples neebe prevista iha artigu 30 no 138 Kodigu Penal Timor Leste.
Hatan ba akuzasaun neebe iha, arguidu nain lima hili direitu nonok, no iha arguidu MX mak hili direitu koalia.
Iha sala julgamentu laran arguidu deklara katak, momentu neeba arguidu koalia hela ho telefone, tanba nee arguidu la haree se se mak hamriik iha fatin neeba, no arguidu mos la konhese arguidu nain lima seluk.
Arguidu deklara, kona-ba vitima sira tula bibi ho motor liu husi estrada arguidu la haree, tanba arguidu fokus hela koalia ho telefone. No iha oras balu arguidu rona motor ida monu tarutu, arguidu mos halai ba hodi haree, no iha fatin akontesimentu nee iha vitima ida mak monu tun husi motor raan sai hela, maibe laos arguidu mesak mak halai ba haree maibe ema barak.
Arguidu mos deklara, la konhese vitima no la iha problema ho vitima. Arguidu mos nega nein lori fatuk tuda ba iha vitima no la envolve iha problema nee.
Banhira Tribunal loke CCTV neebe iha, arguidu nafatin nega, la Konhese arguidu sira neebe CCTV akapta, tanba momentu neeba arguidu tur ho distansia dook oituan.
Aleinde nee Tribunal konfirma ba iha sasin Becior Len Mendes da Silva, sasin deklara katak, momentu neeba sasin tur hela iha mota ninin, lezadu mos mosu ba iha sasin hodi koalia halimar. No ikus mai sasin no vitima deside hodi lao halimar, no sira ba iha Metiaut sira haree ema nia bibi ida, sira mos foti atu lori ba faan iha Klak Fuik.
Sasin deklara, motor vitima mak lori, no sasin mak kous bibi, sira atu liu husi Rate Bekusi nian, momentu neeba too iha Halihun Hun boot rotunda Hali Laran nian, vitima no sasin mos hetan kolega Kevin no Dito, tanba nee vitima mos bolu sira nain rua atu tuir sira ba Klak Fuik.
Sasin deklara, sira ho motor rua halai ba, too iha rate Bekusi nia oin, sira rona ema balu basa liman, no derepente deit arguidu MX foti fatuk ida tuda kona iha vitima nia inus, maibe vitima seidauk mate kontinua konduz motor.
Sasin deklara, momentu neeba arguidu sira kontinua duni lori fatuk tuda vitima no sasin, tanba nee Kevin no Dito tauk hodi konduz motor halai tiha.
Sasin kontinua haree arguidu nain ida foti fatuk tuda vitima, no ikus liu arguidu nain ida foti tan fatuk boot hiit riba ba iha vitima, halo vitima dezmaia hodi motor monu rasik ba rai.
No sasin mos haree motor monu ona, halo sasin tauk hodi halai husi fatin akontesimentu. Sasin deklara, la iha problema ho arguidu sira antes nee, no sasin mos la envolve iha grupu ruma, maibe sasin Konhese arguidu sira tanba uluk kiik sira mos halimar hamutuk.
Tribunal mos konfirima ba iha video neebe CCTV akapta, sasin Konhese hotu arguidu sira neebe video nee akapta.
Rona tiha sasin nee, Tribunal adia fali ba loron seluk hodi rona sasin sira seluk.
Audensia julgamentu nee prezide husi Juiz Koletivu, Ivan Patrocenio, Zulmira Auxiladora, Arjentino Nunes, Ministeriu Publiku reprezenta husi Prokurador Renato Bere Nahac, arguidu sira hetan asistensia legal husi Defensior Publiku, Pedro Aparicio.
(ter)
