BAUKAU, STLTIMORLESTE.com – Estrada Nasional diresaun Baukau-Vikeke kilometru (Km) 10 resin iha area Aslaitula, Postu Administrativu Ossu, Munisipiu Vikeke daudaun nee kondisaun aat.
“Hau hanoin iha Aslaitula nee iha tempu udan estrada nee aat liu, maibe atraves husi media ami informa nafatin ba nasional kona-ba situasaun nee,” Prezidente Autoridade Munisipiu Vikeke, Francisco C.S de Gonzaga Soares informa ba jornalista STL liu husi telefone, Sesta nee (04/07/2025).
Nia esplika, distansia estrada kondisaun aat iha area Aslaitula too Postu Ossu Vila pur-volta Km 10, iha neebe tempu udan difikulta movimentasaun transporte publiku no privadu, tanba rai kois.
Maibe tempu bailoron bele fasilita movimentasaun ema ho transporte, tanba estrada kuak sira neebe iha kuaze impaktu husi inundasaun taka rasik estrada kuak sira neebe eziste iha diresaun refere.
“Neste momentu ita bele dehan katak sei diak liu tinan hirak liu ba, ida nee la hatene dala ruma udan rai sira halai taka fali kuak sira neebe ita haree buat sira nee lao ba la aat hanesan uluk, maibe difikulta ita iha tempu udan,” Francisco argumentu.
Mezmu nunee, maibe Autoridade Munisipiu Vikeke nee kontinua rekomenda ba Ministeriu Obras Publikas atu aselera prosesu reabilitasaun estrada refere, tanba tuir informasaun neebe iha, daudaun iha ona prosesu laran no hein implementasaun.
(tom)
