DILI, STLTIMORLESTE.com – Tribunal Judisial Primeira Instansia Dili liu husi depaisu ikus ba iha prosesu Primeiru Interogatoriu, deside aplika Medida Termu Indentidade Rezidensia no Medida Aprezentasaun Periodika ba arguidu ho inisial MC.
Arguidu lori mai iha Tribunal, no Ministeriu Publiku promove arguidu ho krimi Roubo, Furtu Simples, Furto Beikulu nia uzu, no Ofensa Simples.
Depois de Juiz turnu Jose Quintao halo tiha identifikasaun ba arguidu, ikus mai Juiz deside hodi aplika medida rua ba arguidu mak medida Termu Indentidade Rezidensia no Aprezentasaun Periodika.
“Tribunal aplika Medida Termu Indentidade Rezidensia no Aprezentasaun Periodika ba arguidu atu aprezenta aan iha eskuadra Polisia neebe hela besik ba, semana ida dala ida iha loron Sesta,” dehan defeza arguidu nian Manuel Amaral ba jornalista STL iha Tribunal Dili Sesta nee.
Nia hatutan, Tribunal konsidera katak la prienxe ba krimi roubo, tanba nee mak Tribunal bazeia deit ba iha krimi tolu hodi aplika medida Aprezentasaun Periodika ba arguidu, atu hein prosesu investigasaun neebe iha.
Esplika, iha alegasaun Ministeriu Publiku husu atu aplika medida Aprezentasaun Periodika ba arguidu, enkuantu defeza mos aseita ho medida nee, hodi hein prosesu investigasaun, tanba iha sala julgamentu laran arguidu deklara katak, laos arguidu mak foti telefone nee maibe arguidu nia kolega mak foti, tanba nee arguidu mos simu tutan telefone nee husi nia kolega atu lori ba fo iha lezadu mak Polisia kaer arguidu.
Defeza konsidera katak, aseita ho medida neebe Tribunal aplika ona, tanba nee sei la halo rekursu hasoru despaisu nee.
Tuir kronolojia katak, momentu neeba arguidu ba iha Manumeta Raihun arguidu foti tiha lezadu nia telefone, no lezadu buka fali lezadu nia telefone mak lezadu nia kolega ida foin dehan ba lezadu katak, o nia telefone ema foti tiha ona.
Ho nunee, lezadu mos konduz motor ida hodi tuir arguidu, too iha Matadoru lezadu haree arguidu no lezadu husu nia telefone, maibe arguidu la fo lezadu nia telefone, arguidu halo kedan agresaun ba lezadu hodi hadau tiha lezadu nia motor.
Tanba nee mak lezadu mos lao ain deit, hodi ba hatoo keixa iha Polisia, no ikus mai Polisia hodi ba buka tuir arguidu hodi detein.
Prosesu nee prezide husi Juiz Jose Quintao, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku, Manuel Amaral.
(eme)
